Այսօր կեսօրից արդեն բաց է Սյունիքի մարզի Շիշկերտ Գյուղը Կապանին կապող միակ ճանապարհը, որը փակվել էր դեկտեմբերի 6-ին ճանապարհին տեղի ունեցած խոշոր ծավալի քարաթափման հետեւանքով: Մոտ 50 կմ Կապանից հեռու գտնվող Շիշկերտ գյուղը մեկ շաբաթ շարունակ կտրված էր մնացել մարզկենտրոնից: Խիստ անհրաժեշտության դեպքում` մարդիկ ստիպված ոտքով էին անցնում ճանապարհի փակ հատվածը եւ մյուս կողմից` Ծավ գյուղից, մեքենայով գնում դեպի Կապան: «Մարդիկ կային, որ շաբաթ-կիրակի օրերին գյուղ էին եկել եւ ճանապարհը փակվելուց հետո մնացել գյուղում, նույնիսկ մի քանի օր չեն կարողացել գործի գնալ: Ստիպված մեքենաները թողել են էստեղ ու ուրիշ մեքենայով Ծավ գյուղից քաղաք գնացել», -ասաց Շիշկերտ գյուղի մշտական բնակչուհի Քարամելան: Ծավ եւ Շիշկերտ գյուղերն ընդգրկող Ծավ գյուղական համայնքի ղեկավար Սեյրան Զաքարյանն Aravot.am-ին փոխանցեց, որ ճանապարհն այժմ ամբողջովին բաց է երթեւեկության համար, վտանգ ներկայացնող ժայռաբեկորների պայթեցման ու քարերի մաքրման աշխատանքներն ավարտվել են:
Նշենք, որ ժայռաբեկորների մեծության պատճառով հնարավոր չէր լինում քարամաքրման եւ հողահեռացման աշխատանքներ իրականացնել Ծավ-Շիշկերտ ճանապարհահատվածի վրա: Սյունիքի մարզային փրկարարական վարչության պետ Արթուր Հարությունյանի խոսքով` դեկտեմբերի 6-ի քարաթափումն արտառոց էր, ժայռաբեկորները շատ մեծ էին, ուստի պայթեցման աշխատանքները երկար տեւեցին: «Սյունիքի մարզային փրկարարական ծառայության աշխատակիցները մայրաքաղաքից եկած հատուկ փրկարար ջոկատի տղաների հետ միասին այս օրերին պայթեցման աշխատանքներ են իրականցրել տվյալ հատվածում: Ժայռերի բեկորները շատ մեծ են եղել, ոչ մի տեխնիկա չէր կարող մաքրել դրանք, վտանգավոր ժայռաբեկորները պայթեցումների միջոցով մանրացրել ենք, կանխել վտանգը: Նույնիսկ 100 խորանարդ մետր ծավալով մի մեծ բեկոր էլ ստիպված ենք եղել մի քանի անգամ պայթեցնել, 6 օր տեւեց մեր աշխատանքը: Այդ ճանապարհը ժայռոտ տեղանքում է, հողմահարվում է եւ միշտ էլ քարաթափում է լինում, բայց այս մեկը խոշոր ծավալի քարաթափում էր»,- նշեց պարոն Հարությունյանը: Կապանի ճանապարհաշինարարական ընկերության աշխատակիցները պայթեցումներից հետո ճանապարհը մաքրել են քարերից եւ այն երկկողմանի երթեւեկելի դարձրել:
Հիշեցնենք, որ դեկտեմբերի 6-ին ժամը 17-ի սահմաններում Սյունիքի մարզի Ծավ եւ Շիշկերտ գյուղերն իրար միացնող միջպետական ճանապարհի 3-րդ կիլոմետրի վրա խոշոր փլուզում էր տեղի ունեցել, որի հետեւանքով երկկողմանի փակվել էր ճանապարհն ու բազմաթիվ դժվարություններ առաջացրել բնակիչների համար: Դեպքի վայր էին ժամանել ԱԻՆ-ի, տրանսպորտի եւ կապի նախարարության, Սյունիքի մարզպետարանի, Կապանի ճանապարհաշինարարական ընկերության աշխատակիցները:
Մերի ՍՈՂՈՄՈՆՅԱՆ
Կարդացեք նաև
