Ամերիկացի փորձագետներն ու ակտիվիստներն իրենց կառավարությանը կոչ են արել պատժամիջոցներ կիրառել Բաքվի դեմ՝ կապված Ադրբեջանում մարդու իրավունքների կոպիտ խախտումների հետ: Այդ կոչերը հնչել են դեկտեմբերի 12-ին Վաշինգթոնում տեղի ունեցած քննարկման ժամանակ, որը կազմակերպել էր Ամերիկայի ադրբեջանցիների միությունը, փոխանցում է «Կոնտակտ»-ը:
Բաքվում ԱՄՆ նախկին դեսպան Ռիչարդ Կոզլարիչը հայտնել է, որ Ադրբեջանի իշխանությունների գործողությունները ցույց են տալիս, որ Ադրբեջանի և ԱՄՆ-ի միջև համագործակցությունը ավարտին է հասնում:
Դիվանագետը, որը Բաքվում պաշտոնավարել է Հեյդար Ալիևի իշխանության տարիներին (1994-1997), քննդատել է Իլհամ Ալիևի վարչակազմին, որ ԱՄՆ-ին փորձում են որպես 5-րդ շարասյուն ներկայացնել ու ամերիկյան կազմակերպություններին դիտարկում են իբրև պետության սպառնալիք:
Որպես պատասխան, նա առաջարկել է, որ Վաշինգտոնն իր քաղաքացիներին զգուշացնի՝ Ադրբեջան այցելելու դեպքում ձեզ կարող են հետապնդել, թաքուն նկարահանել և հնարավոր է՝ այլ վատ բաներ էլ տեղի ունենան. «Եթե դիվանագիտական մեթոդները Ալիևի վրա չեն ազդում, ապա ժամանակն է դիտարկել պատժամիջոցների ձևը, որոնք ցույց կտան, որ մարդու իրավունքների խախտումները կարող են հետևանքներ ունենալ», – ասել է նա:
Կարդացեք նաև
«Freedom House» իրավապաշտպան կազմակերպության նախկին նախագահ, իսկ այժմ Մաքքեյն ինստիտուտի տնօրեն Դևիդ Կրամերը իր ելույթում նշել է, որ պատժամիջոցներ չեն սահմանվի, եթե կառավարությունն իր քաղաքացիներին հարգանքով վերաբերվի:
«Պատժամիջոցները համակարգը փոխելու համար չեն նախատեսված, այլ որպեսզի համակարգը հասկանա, որ իրեն հարկավոր է փոխվել», – ասել է նա՝ հիշեցնելով, որ Ադրբեջանում քաղաբանտարկյալների թիվը կրկնակի ավելի է, քան Ռուսաստանում ու Բելառուսում, որոնց նկատամամբ արևմուտքը պատժամիջոցներ է կիրառել:
Նա նաև եվրոպացի քաղաքական գործիչներին առաջարկել է բոյկոտել 2015թ. Բաքվում կայանալիք եվրոպական խաղերը, ինչպես դա արվեց Սոչիի ձմեռային օլիմպիական խաղերի ժամանակ:
«Ալևի իմիջին մեծ հարված կլինի Կենտրոնական ստադիոնում արևմտյան առաջնորդների կողքին կանգնելուց զրկվելը», – ասել է Կրամերը:
Պատրաստեց Հովհաննես ԻՇԽԱՆՅԱՆԸ
