ՀՀ քննչական կոմիտեի Լոռու մարզային քննչական վարչությունում ավարտվել է Վանաձորի անչափահաս բնակչուհու կողմից՝ իրեն բռնաբարելու վերաբերյալ սուտ մատնություն կատարելու դեպքի առթիվ հարուցված քրեական գործի նախաքննությունը:
Քրեական գործի նախաքննությամբ ձեռք բերված ապացույցներով պարզվել է, որ բնակչուհին 2014 թվականին համացանցի «Odnoklassniki.ru» կայքի միջոցով ծանոթացել և շուրջ 2 ամիս ծնողներից գաղտնի պարբերաբար հանդիպել է մի տղայի հետ: Արդյունքում՝ երիտասարդները ամուսնության շուրջ համաձայնության են եկել:
2014 թվականի հոկտեմբերի 23-ին՝ ժամը 13:00-ի սահմաններում, նախնական պայմանավորվածության համաձայն՝ նրանք հանդիպել են Վանաձորի «Երկաթուղայինների» այգում, որտեղ էլ տղան աղջկան հայտնել է, որ առաջիկայում մեկնելու է զինծառայության, ինչ պատճառով վերջինս վրդովվել է և նրան մեղադրել իրեն խաբելու մեջ՝ սպառնալով պատասխանատվության ենթարկել նրան՝ գոռգոռացել , քաշքշել:
Արդյունքում՝ իր հետ չամուսնանալու համար վրեժխնդիր լինելու նպատակով աղջիկն այգու տարածքում ծառայություն իրականացնող ոստիկանության պարեկապահակետային ծառայության աշխատակիցներին հայտնել է, որ ընկերն այգում իրեն ծեծել և բռնաբարել է, որից հետո դիմել է փախուստի:
Կարդացեք նաև
Ոստիկանության բաժնում նախազգուշացված լինելով սուտ մատնության համար ՀՀ քրեական օրենսգրքի 333-րդ հոդվածով նախատեսված քրեական պատասխանատվության մասին և գիտակցելով, որ իր տրամադրած տեղեկատվությունը կեղծ է՝ աղջիկը հանցագործության մասին գրավոր հաղորդում է ներկայացրել՝ հայտնելով, որ նույն թվականի հոկտեմբերի 23-ին՝ ժամը 14:00-ի սահմաններում ընկերը Վանաձոր քաղաքի «Երկաթուղայինների» այգում, դանակի սպառնալիքով և քնաբեր դեղամիջոց տալով, բռնաբարել է իրեն:
Աղջկան մեղադրանք է առաջադրվել ՀՀ քրեական օրենսգրքի 333-րդ հոդվածի 2-րդ մասի 1-ին կետով:
2014 թվականի դեկտեմբերի 9-ին քրեական գործը մեղադրական եզրակացությամբ ուղարկվել է ՀՀ Լոռու մարզի դատախազություն: Քրեական գործով նախաքննության օրինականության նկատմամբ հսկողություն իրականացնող դատախազը հաստատել է մեղադրական եզրակացությունը, և գործն ուղարկվել է Լոռու մարզի ընդհանուր իրավասության դատարան:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
ՀՀ քննչական կոմիտեի տեղեկատվության և
հասարակայնության հետ կապերի բաժին
