Հայաստանի լիբերալ կուսակցությունն օրեր առաջ հայտարարեց, որ միանում է համաժողովրդական շարժմանը՝ պատրաստ իր ամբողջ ռեսուրսներով ներգրավվել շարժման գրասենյակների աշխատանքներին:
«Սա լավագույն ճանապարհն է լինելու Հայաստանի քաղաքացու կողքին համախմբելու բոլոր առողջ ուժերին և ստեղծելու ներքին մրցակցություն՝ խրախուսելով շարժման առավել ընդգրկունությունը»,-ասված էր հայտարարության մեջ:
Հայաստանի Լիբերալ կուսակցության նախագահ Հովհաննես Հովհաննիսյանը ԲՀԿ առաջնորդ Գագիկ Ծառուկյանի հետ հանդիպման ընթացքում կրկին անգամ վերահաստատեց շարժմանը միանալու կուսակցության որոշումը՝ ընդգծելով, որ թիմակիցների մոտ շարժման հանդեպ վստահություն է ձևավորվել ԲՀԿ առաջնորդի անկեղծության և նրա գլխավորած քաղաքական թիմի շնորհիվ:
Հովհաննես Հովհաննիսյանի գնահատմամբ Հայաստանը հայտնվել է ծայրահեղ վիճակում, իշխանությունները, որոնք շփոթվել են իրենց գործողությունների մեջ, այդպես էլ որևէ խնդիր լուծելու փորձ չեն անում:
Կարդացեք նաև
«Մեր երկրին անհրաժեշտ են փորձառու և բանիմաց մարդիկ, ովքեր, անկախ կուսակցական պատկանելությունից, կարող են իրենց արդյունավետ աշխատանքով պիտանի լինել երկրի առջև կուտակված խնդիրների լուծմանը»,-իր հերթին նշեց Գագիկ Ծառուկյանը՝ հավելելով, որ պատրաստ է գործակցելու բոլոր այն ուժերի ու անհատների հետ, ովքեր ցանկություն ունեն միանալու համաժողովրդական շարժմանը:
«Այսօր իշխանության մեջ կան մարդիկ, ովքեր չեն կարողանում ֆինանսատնտեսական այս դժվարին ժամանակահատվածում ժողովրդին հուզող խնդիրների դեմն առնել, դրանք կարգավորելու հստակ ծրագրեր ներկայացնել: Մինչդեռ այդպես չպետք է լիներ»,-նկատեց Գագիկ Ծառուկյանը:
Նա նաեւ ընդգծել է. «Որ ասում եմ՝ նոր որակի իշխանության ստեղծում, չի նշանակում, որ գալով՝ պետք է ջարդեն, փշրեն, ավիրեն, այլ հակառակը՝ պետք է կարողանան ճիշտ ծրագիր ներկայացնեն, հզորացնեն, զարգացնեն և ժողովրդին արժանապատիվ կյանքով ապահովեն»։
Գագիկ Ծառուկյանի խոսքով՝ համաժողովրդական շարժման գրասենյակների աշխատանքներն ու իրականացված հարցումները վկայում են, որ մարդկանց մեջ կրկին հույս է արթնացել, նրանց ճնշող մեծամասնությունը սպասում է, որ իր կյանքում անպայման փոփոխություն է լինելու:
«Մենք պատրաստ ենք ցանկացած հարցում լինել Ձեր կողքին, աջակցել շարժմանը մեր ամբողջ ներուժով»,-հանդիպման ավարտին ևս մեկ անգամ ընդգծեցին Հայաստանի Լիբերալ կուսակցության ներկայացուցիչները:
Քաղաքական տարբեր ուժերի, հասարակական կազմակերպությունների ու արտախորհրդարանական կուսակցությունների հետ Գագիկ Ծառուկյանի հանդիպումների շարքը շարունակվում է:
ԲՀԿ
