Արդեն երկար ժամանակ է, ինչ Երևանի Վալերի Բրյուսովի անվան պետական լեզվաբանական համալսարանը ամեն տարվա վերջում մրցանակաբաշխություն է կազմակերպում, և այս տարին նույնպես բացառություն չէր:
Այսօր հանդիսությունների սրահներից մեկում ԵՊԼՀ-ի ուսանողական խորհուրդը Հայաստանի երիտասարդական հիմնադրամի հետ միասին կազմակերպեց «ԵՊԼՀ լավագույն ուսանող» խորագրով մրցանակաբաշխությունը:
ՈՒԽ անդամները, դասախոսներն ու համալսարանի աշխատակիցներն ուշադիր հետևում են ուսանողներին, և տարվա վերջում առանձնացնում լավագույններին ու ակտիվներին, ընտրում լավագույն ֆակուլտետ և ուսանողական խորհրդի լավագույն հանձնաժողով: Իսկ լավագույնների շարքում հայտնվելու համար ուսանողներից պահանջվում է գերազանց առաջադիմություն, հասարակական ու համալսարանական կյանքում ակտիվ ներկայություն. համալսարանի անունը տարբեր միջոցառումներում ու մրցույթներում բարձր պահողներին ոչ մի պարագայում չի հաջողվի «խուսափել» մրցանակ ստանալուց:
Միջոցառման ժամանակ հայտնի դարձան ԵՊԼՀ երեք ֆակուլտետների լավագույն ուսանողները, որոնցից մեկն էլ արժանացավ «ԵՊԼՀ 2014 թվականի լավագույն ուսանող» տիտղոսին: Պարգևատրվեցին նաև համալսարանի տասը ամենաակտիվ ուսանողները, ամփոփվեցին «ԵՊԼՀ լավագույն ֆակուլտետային ուսանողական խորհուրդ 2014» և «ՈՒԽ լավագույն հանձնաժողով 2014» մրցույթների արդյունքները: Համալսարանի առաջին կուրսեցիները նույնպես անմասն չմնացին տոնախմբությունից ու հանդիսավոր կերպով ստացան իրենց ստուգման գրքույկները:
Կարդացեք նաև
ԵՊԼՀ ռեկտորի գլխավոր խորհրդական Հասմիկ Ափյանը Aravot.am-ի հետ զրույցում նշեց. «Տարվա ընթացքում մեր ուսանողներն ակտիվ սովորում են, մասնակցում տարբեր գիտակրթական միջոցառումների, կոնֆերանսների, և մենք փորձում ենք այսօր առանձնացնել ամենալավ սովորող ուսանողներին, խրախուսել նրանց, որպեսզի նպաստենք նրանց բարձր առաջադիմությանը և ցույց տալ, որ լինելով ակտիվ ու համալսարանական տարբեր ծրագրերին մասնակցություն ունենալով, կարող են նկատվել, առանձնանալ ու կարևորվել: Կարծում եմ՝ դա լավ խթան է՝ նրանց հետագա գործունեության համար»:
Մրցանակաբաշխությունն ուղեկցվեց գեղեցիկ համերգային ծրագրով, որի ժամանակ ելույթ ունեցան հայկական էստրադայի երգիչ-երգչուհիները, ինչպես նաև Երևանի պետական լեզվաբանական համալսարանի տաղանդավոր ուսանողները:
Սյունե ՍԵՎԱԴԱ
