« Մոսկվա» կինոթատրոնում այս պահին Ջեմալ-փաշայի թոռան՝ Հասան Ջեմալի հետ հանդիպումն է ընթանում: Լրագրող, գրող, հրապարակախոս, տասներկու գրքերի հեղինակ Հասան Ջեմալը ներկայացնում է հայոց ցեղասպանության մասին գրած իր գիրքը: Նա խոստովանեց, որ իրեն Հայաստան է բերել իր սիրելի Հրանտ Դինքի ցավը. «Եվ նրա ցավերը, որոնցից գլխավորը Ցեղասպանության ցավն է: Սիրելի Հրանտի՝ եղբորս ցավը պատճառ դարձավ, որ ես գրեմ այս գիրքը: Սիրելի եղբայրս կյանքով վճարեց, նա մահացու հարված հասցրեց քարացած տաբուներին: Նա կարողացավ Ցեղասպանության ցավը մեկ անգամ ևս զգացնել տալ մեզ: Նա օգնեց հասկանալ այդ ցավերը և կիսել դրանք: Նա ազատ արձակեց իմ գերի ընկած միտքը և մեկ անգամ ևս օգնեց ըմբռնել, որ ցանկացած տեսակի ազգայնամոլություն խաղաղության խախտում է:
Մարդկության ամենամեծ սխալներից է պատմությունից վախենալը, այսպիսի ծիծաղելի վախը շատ տարածված է իմ երկրում՝ Թուրքիայում: Եկեք պատմության պատճառով չթշնամանանք միմյանց հետ: Պատմությունն էլ, կյանքն էլ ժամանակ առ ժամանակ շատ դաժան է:
Հրանտ եղբայրս մի մոմ վառեց, հիմա հերթը մերն է, պետք է չկառչենք մահերից և կառչենք կյանքից: Ես եկել եմ այստեղ կիսելու Ցեղասպանության պատճառով ձեր կրած ցավերը»,- հանդիպման ժամանակ ասաց Հասան Ջեմալը:
Արփինե ՍԻՄՈՆՅԱՆ
