«1991-ց սկսած ընդդիմությունը բոլոր ժամանակներում իշխանափոխություն է պահանջել: Երբ ընդդիմությունը չունի ռազմավարություն, այդ դեպքում գնում է նման քայլերի»,-այսօր «Իրատես դե ֆակտո» մամուլի ակումբում լրագրողների հետ հանդիպմանը պատասխանելով եռյակի՝ իշխանափոխության կոչերի մասին հարցերին, այսպիսի կարծիք հայտնեց ՀՀԿ խմբակցության պատգամավոր Վահրամ Մկրտչյանը: Նա նկատեց, թե «բացառությամբ 1996-ի նախագահական ընտրություններից հետո, չի եղել նախադեպ, որ ընդդիմությունը ճնշում գործադրի նախագահի վրա, որպեսզի նա հեռանա»:
ՀՀԿ-ական պատգամավորը ընդդիմության կոչերը համարում է «հասարակությանը լարվածության և սպասումների մեջ գցող կոչեր» ու մանրամասնում. «Նրանք ռազմավարություն մշակելու փոխարեն սկսում են ազդել մարդկանց վրա: Այդ վատ կետերի վրա ցանկացած մեկը կարող է զգացմունքային մանիպուլյացիա կազմակերպել:Այնպես որ, ես Հայաստանում իշխանափոխության հիմքեր չեմ տեսնում»:
Անդրադառնալով Եվրասիական տնտեսական միությանը՝(ԵՏՄ) ՀՀ-ի անդամակցությանը, պարոն Մկրտչյանն ասաց. «ԵՏՄ-ին անդամակցումը մեր փոքր հանրապետության համար լուրջ դռներ է բացում, սակայն սա 100 տոկոսանոց հնարավորություններ չի նախանշում»:
Aravot.am-ի դիտարկմանը՝ ինչու՞ պատգամավորը չի նշում նաև այդ անդամակցության ռիսկերը՝ անկայուն շուկա, ինքնիշխանության կորուստ, ոչ հավասար ձայնի իրավունք, Վահրամ Մկրտչյանը պատասխանեց. ««Վերլուծություններից մեկն էլ արտաքին առևտրի մասն է: Ինչ վերաբերում է ինքնիշխանությանը, ապա այդ մասով ասեմ, որ ցանկացած միության մեջ մտնելով՝ պետությունը իր գործառույթների որոշ մասը վերպետական կառույցների է օտարում: Բայց պետք է համեմատական կարգով նայել՝ ինչ եք զիջում ու ստանում»:
Կարդացեք նաև
Հավասար ձայնի իրավունք չունենալու մտահոգությանն ի պատասխան պարոն Մկրտչյանն ասաց. «ԵՏՄ կառուցվածքի համաձայն՝ բոլոր ձևաչափերով կոնսենսուսով է որոշում կայացվում: Առանց մեր ձայնի երկու երկիր չեն կարողանա որոշում կայացնել: Իսկ փետրվարից արդեն կունենանք երեք ձայնի իրավունք»:
Տաթև ՀԱՐՈՒԹՅՈՒՆՅԱՆ
