«Բացասական հետեւանքները շատ լուրջ են լինելու»,- այսօր՝ դեկտեմբերի 11-ին, «Տեսակետ» մամլո ակումբում լրագրողների հետ հանդիպման ընթացքում, անդրադառնալով Հայաստանի՝ Եվրասիական տնտեսական միությանն անդամակցությանը, հայտարարեց քաղաքագետ Ստեփան Գրիգորյանը:
Նրա խոսքերով՝ Եվրասիական տնտեսական միությունը ռեալ աշխատող ինստիտուտ չէ: Ստեփան Գրիգորյանը համարում է, որ Հայաստանը մտնում է մի կազմակերպություն, որը չկա: Նա նշեց, որ Ռուսաստանը փակել է իր սահմանները Բելառուսի առջեւ, Բելառուսն էլ իր հերթին փակել է իր սահմանները Ռուսաստանի սահմանների համար. «Այդ ինստիտուտը դեռ նոր է ստեղծվել, դեռ պարզ չէ, թե ինչպե՞ս է աշխատելու, բայց ժամանակը ցույց է տալիս, որ մեծ խմորումներ կլինեն: Դեռ պարզ չէ, թե ինչպե՞ս է աշխատելու Մաքսային միությունը, ինչպե՞ս է աշխատելու Եվրասիական տնտեսական միությունը: Այն սպասելիքները, որ առանձին մարդիկ ունեին, պարզ չէ, թե երբ կաշխատեն»:
Անդրադառնալով Ռուսաստանի դեմ կիրառվող պատժամիջոցներին՝ պարոն Գրիգորյանը նկատեց, որ պատժամիջոցների տակ գտնվող ռուսական կազմակերպություններն իրենց մասնաճյուղերն ունեն Հայաստանում, այսինքն՝ այդ պատժամիջոցներն ազդելու են նաեւ Հայաստանի վրա. «Դժբախտաբար, հարաբերությունների սրումը շարունակվում է: Երկու օր առաջ Լավրովը հայտարարեց, որ չի բացառվում, որ իրենք դիմեն իրենց Եվրասիական տնտեսական միության գործընկերներին, որ իրենք միանան պատասխան պատժամիջոցներին: Դա ուղղակի կշոշափի մեր անվտանգությունը, մեր շահերը»:
Ստեփան Գրիգորյանը հավելեց, որ ազատության հետ խնդիրներ են լինելու: Նրա խոսքերով՝ Ռուսաստանը կարող է հայտարարել, որ Հայաստանում առկա ազատությունը նորմալ չէ: Ըստ նրա՝ Եվրասիական տնտեսական միություն անդամակցության հետեւանքով միջազգային կառույցների հետ Հայաստանի հարաբերություններն էլ կվտանգվեն. «Դա սպառնալիք է Հայաստանի անկախության համար: Պայքարը շարունակվում է, Ռուսաստանը, հաշվի առնելով, որ մենք իր ռազմավարական գործընկերն ենք կարող է մեզնից ակնկալել համապատասխան կոշտ քայլեր»:
Կարդացեք նաև
Անդրադառնալով Հայաստանի՝ Եվրասիական տնտեսական միության անդամակցության դրական կողմերին՝ Ստեփան Գրիգորյանը հայտարարեց, որ ինքը դրական կողմեր չի տեսնում. «Ես կողմնակից եմ, որ Ռուսաստանի հետ զարգացնենք երկկողմ հարաբերություններ, ես դեմ եմ բազմակողմանի հարաբերություններին: Երբ որ մտնում եք ԵՏՄ, դուք ստանձնում եք պարտավորություններ մի քանի պետությունների առջեւ: Ես ինչո՞ւ պետք է պարտավորություններ ստանձնեմ Բելառուսի համար: Բելառուսը գտնվում է Եվրոպայի կողքին, իր սահմանները բաց են, խնդիր չունի: Ես կարծում եմ, որ իմ վատատեսությունը կապված է նրա հետ, որ չեմ տեսնում, որ ԵՏՄ-ն կամ ՄՄ-ն կաշխատեն»:
Ամի ՉԻՉԱԿՅԱՆ
