«Շատ տգեղ է, շատ վատ է այդ ծեծը: Չգիտեմ ինչի համար է՝ պատճառները քաղաքական են, մարդային են, թե ինչ են, ես չեմ ընդունում ազատամարտիկներին ծեծելը: Ավելի ճիշտ՝ վատ եմ ընդունում: Շատ բացասական երեւույթ է>,- այսօր «Հայելի» ակումբում ազատամարտիկների ծեծի հետ կապված այսպիսի գնահատական տվեց ՀՀԿ պատգամավոր Լեռնիկ Ալեքսանյանը:
ԲՀԿ-ական պատգամավոր Լյովա Խաչատրյանը կարճ արտահայտվեց՝ «Նողկալի է»:
Հարցին՝ կբացահայտվի՞ այդ դեպքը՝ Լեռնիկ Ալեքսանյանի պատասխանը տարօրինակ էր: Նա ասաց, որ այդպիսի տրամադրվածություն կա: Aravot.am-ը ճշտեց՝ ո՞ւմ մոտ կա տրամադրվածություն՝ բացահայտելու: Նա պատասխանեց՝ ոստիկանության: Հիշեցնենք, որ ոստիկանապետ Վլադիմիր Գասպարյանն ասել էր, որ հայտարարություն չեն տվել ազատամարտիկները եւ իրենք չեն զբաղվում խնդրով:
Լրագրողների դիտարկմանը, որ շրջանառվում է ոստիկանապետի տեղակալի թիկնապահների անունները՝ Լեռնիկ Ալեքսանյանն ասաց. «Հենց դրա համար, որ ոստիկանության թիկնապահների անունն է շոշափվում՝ տրամադրվածությունն այդպես է գալիս»: ՀՀԿ պատգամավորն ասաց, որ ինքը ինֆորմացիա ունի այդ մասին, որ տրամադրված են բացահայտելու:
Կարդացեք նաև
Անդրադառնալով Ամանորի նախաշեմին գյուղմթերքի թանկացմանը՝ Լեռնիկ Ալեքսանյանն ասաց, որ թանկացումներ շատ չեն լինի:
Լյովա Խաչատրյանի դիտարկմամբ՝ թանկացման համար հիմնական պատճառը դրամի արժեզրկումն է. «Դոլարով առնում են, ներմուծում են, տուժվում են: Գնաճը լինելու է զգալի, մարդիկ ավելի վատ են զգալու, քանի որ տրանսֆերտներն էլ են պակասելու: Ժողովրդի մեծ մասի ռեալ եկամտի միակ աղբյուրն է դա»:
Լյովա Խաչատրյանի դիտարկմամբ նավթի գինը շուկան չի որոշում, քաղաքական որոշումով է կայացվում գինը եւ մենք չգիտենք, թե ինչպիսի քաղաքական որոշում կլինի: Թե ինչ պետք է արվի՝ տնտեսությունը հնարավորինս ճգնաժամից դուրս բերելու, փոխարժեքի տատանման հետեւանքները նվազեցնելու:
Մեր հարցին, թանկացումներն ամանորյա գնումների վրա ինչպես կանդրադառնան՝ Լեռնիկ Ալեքսանյանը պատասխանեց. «Նայած ով ինչպես է անցկացնում, մեկը արտասահմանում է անցկացնում, մեկը՝ Դիլիջանում, Սեւանում. ես տանն եմ անցկացնում: Բայց չգիտեմ, թե ինչքան ծախս կլինի»:
Լյովա Խաչատրյանն ասաց, որ իրենց տան ծախսերի հետ ընդհանրապես կապ չունի եւ ինքն անձամբ իր համար նույնիսկ թաշկինակ գնած չկա: Ամանորի սեղանին ԲՀԿ պատգամավորը դնելու է հիմնականում իր մշակած մթերքները եւ իր պահած կենդանիների մսերը. «Հավ էլ ունեմ, ղազ էլ ունեմ , խոզ ունեմ, գոճի, որը մորթելու եմ Նոր տարվան»:
Հռիփսիմե ՋԵԲԵՋՅԱՆ
