«Ռուսաստանը մեր ռազմավարական դաշնակիցն է եւ մենք ակնկալում ենք, որ Ռուսաստանը միշտ հիշի դա, քանի որ այն բխում է նաեւ իր շահերից»,-Aravot.am-ի հետ զրույցում այսպես պատասխանեց ՀՅԴ Հայ դատի և քաղաքական հարցերի գրասենյակի ղեկավար Կիրո Մանոյանը՝ անդրադառնալով վերջերս Ռուսաստանի նախագահ Վլադիմիր Պուտինի այցին Թուրքիա, որի ընթացքում Ռուսաստանը հայտարարեց, որ նվազեցնելու է Թուրքիա մատակարարվող գազի գինը:
Մեր հարցին, թե ինչպես Ռուսաստանի եւ Թուրքիայի միջեւ տնտեսական այդ սերտ հարաբերությունները կազդեն տարածաշրջանում Հայաստան-Թուրքիա հարաբերությունների վրա, պրն Մանոյանը պատասխանեց.«Հասկանալի է, որ այսօր Թուրքիան Ռուսաստանի համար կարող է ինչ-որ դերակատարություն ներկայացնել, հաշվի առնելով այն, որ Թուրքիան չի մասնակցում արեւմուտքի կողմից Ռուսաստանի նկատմամբ կիրառած պատժամիջոցներին:Այս պարագայում Ռուսաստանը կարող է փորձել բավարարել Թուրքիային, սակայն Թուրքիայի եւ Ռուսաստանի միջեւ հարաբերությունների սերտացումը պետք չէ, որ լինի հայության եւ Հայաստանի հաշվին»։
Պրն Մանոյանը չի բացառում, որ Ռուսաստանը կարող է Թուրքիայի հետ բարեկամական կապերն ամրապնդել հենց Հայաստանի հաշվին. «Կարող է լինել այնպես, որ տնտեսական հարաբերությունների խորանալու դեպքում նաեւ խորը քաղաքական հարաբերություններ ստեղծվեն: Եվ եթե տնտեսական հարաբերություններն այնքան խորանան, որ Ռուսաստանը սկսի ինչ-ինչ պատճառներից ելնելով փորձել բավարարել Թուրքիայի պահանջները, ապա չի բացառվում, որ դա անի մեր հաշվին»:
Կարդացեք նաև
Էլյա ՀՈՎՀԱՆՆԻՍՅԱՆ
