Այսօր ԲՀԿ պատգամավոր Ռուստամ Գասպարյանը ազատամարտիկների հավաքին հայտարարեց. «Արցախի եւ Հայաստանի միջեւ լինելու է մաքսակետ»:
Aravot.am-ի դիտարկմանը, որ դա հերքում են իշխանությունները՝ Ռուստամ Գասպարյանը պատասխանեց. «Եթե մաքսակետ չլինի, ուրեմն Արցախը պետք է միավորեն Հայաստանին, որ Արցախն էլ մտնի Մաքսային միության մեջ: Եթե Հայաստանն առանց Արցախի է մտնում ՄՄ, ո՞նց կարող է երկու պետությունների մեջ ՄՄ չլինի: Մենք չենք ընդունում, որ Արցախը մեր տարածքը չի, հենց դրա համար էլ պայքարում ենք, որ մերը լինի»:
Մեր դիտարկմանը, որ մի քանի անգամ «Ժառանգության» կողմից բարձրացվեց այդ հարցը՝ ԼՂՀ ճանաչման, բայց խորհրդարանական ուժերը մերժեցին, ասացին, որ դրա ժամանակը չի՝ Ռուստամ Գասպարյանը պատասխանեց. «Բայց մեր ճանաչելն ինչ-որ բան կտա՞ր: Ընդունենք, որ մենք ճանաչեցինք Արցախի անկախությունը, դա ինչ-որ բան տալի՞ս է»:
Մեր դիտարկմանը, որ դա առաջին քայլն էր՝ պահանջելու ուրիշներից, որ նույնն անեն՝ նա պատասխանեց. «Կան քաղաքական ինչ-որ բաներ, որ երեւի ժամանակը չի մեր կողմից ճանաչելու: Դեռ մենք պիտի աշխատենք, որ ուրիշները ճանաչեն»:
Կարդացեք նաև
Մեր հարցին՝ եթե մաքսակետ դրվի, Ղարաբաղը չի՞ մեկուսացվի՝ նա պատասխանեց. «Մեր իշխանությունները պատճառաբանում են, թե ձեւականություն է դա լինելու, բայց չեմ կարա ասեմ: Ես մտածում եմ՝ եթե Ադրբեջանը միանա ՄՄ-ին, Ղարաբաղի կազմով է միանալու, չէ՞, քանի որ դեռ այսօր համարվում է Ղարաբաղի կազմ»:
Հռիփսիմե ՋԵԲԵՋՅԱՆ
