Այսօր օպերայում ազատամարտիկները հավաքվել էին՝ որոշելու, թե որոնք են իրենց հետագա անելիքները՝ հրամանատարների հետ կատարված միջադեպից հետո:
Հիշեցնենք, որ դեկտեմբերի 8-ի երեկոյան Արցախյան ազատամարտի մասնակիցներ՝ Ապարանի ջոկատի հրամանատար Ռազմիկ Պետրոսյանը եւ «Արաբո» ջոկատի հրամանատար Մանվել Եղիազարյանը ծեծի էին ենթարկվել: Ազատամարտիկները վստահ են՝ սա իշխանությունների ձեռքի գործն է եւ կատարվածը քաղաքական պատվեր է:
Լրագրողների հետ զրույցում Մանվել Եղիազարյանը զգուշացրեց իշխանություններին, որ եթե շարունակեն այդ գործելաոճը, իրենք ստիպված կլինեն իրենց պաշտպանել: Լրագրողները ճշտեցին՝ ազատամարտիկները կզինվե՞ն: Նա պատասխանեց. «Չէ, իսկ ինչի՞ պիտի զինվենք: Ամեն մարդ իր պայքարի ձեւն ունի, ինչի՞ եք կարծում, որ պիտի զինվենք, որ ասեմ՝ հա, դուք էլ ասեք՝ վաա՜յ, ասեցին զինվելու են, գան տանե՞ն տղաներին: Չէ, աղջիկ ջան, ես զինված պահել եմ այս երկիրը 5 տարի: Ոչ մի իշխանավոր չեն եղել, իրենք փախած են եղել, իրենց կնանիքի փեշի տակ են եղել: Ես ոչ մի հայի վրա ձեռք չեմ բարձրացրել, ոչ կարող եմ գողանալ, թալանել, ես հայրենասեր եմ»:
Aravot.am-ի հարցին՝ ինչո՞ւ հենց որպես թիրախ Դուք ընտրվեցիք՝ հակաիշխանական ելույթներ եք ունենում, դրա հե՞տ է կապված, ինչի՞ հետ եք Դուք կապում՝ նա պատասխանեց. «Ես երդվել եմ մեր ժողովրդին չխաբել՝ ես այդ վիճակում հայտնվել եմ միամիտ: Պատահական եմ ես հայտնվել պանդոկում: Ինձ հրավիրել են, ընկերս կանչել է հաց ուտելու: Պատահական է եղել»:
Կարդացեք նաև
Հարցին՝ մինչ ծեծելը Ձեզ ոստիկանությունում ասե՞լ են, որ չխառնվեք քաղաքականությանը՝ Մանվել Եղիազարյանը պատասխանեց. «Դրանից ի՞նչ օգուտ: Լեւոն Տեր-Պետրոսյանի օրոք նստել եմ Ռոբերտ Քոչարյանի օրոք նստել եմ, կարո՞ղ է Սերժ Սարգսյանն ուրիշ մարդ է: Իր օրոք էլ եմ նստելու, զգուշացնում են, որ ի՞նչ: Նորմալ է»:
Նա վստահեցրեց, որ պայքարը շարունակելու է մինչեւ վերջ. «Չեմ շարունակելու այն ժամանակ, մինչեւ երկիրը կարգի գա: Չեմ ուզում մասնավորեցնեմ, ով էլ լինի նախագահը՝ միայն երկիրը լավ լինի: Մենք այդպիսի ամբիցիաներ չունենք: Այսօր ժողովուրդը սարսափելի ծանր վիճակում է, ատելությամբ են հայերը լցվում արդեն մեկը մյուսի հանդեպ: Այդ վտանգներն են, որ ինձ ստիպում են, որ ըմբոստանամ, խոսք ասեմ, թե չէ անձնապես ես ոչ մեկի հետ խնդիր չունեմ»:
Հռիփսիմե ՋԵԲԵՋՅԱՆ
