«Մարդու իրավունքների պաշտպանության խնդիրները զինված ուժերում օրըստօրե բարձ հիմքերի վրա են դրվում` շնորհիվ զինված ուժերի ղեկավարության, մարդու իրավունքների պաշտպանի հետ համագործակցության, վերահսկողական մեխանիզմների ձեւավորման ջանքերի»,- այսօր` դեկտեմբերի 10-ին` Մարդու իրավունքների պաշտպանության միջազգային օրը, լրագրողների հետ զրույցի ընթացքում, անդրադառնալով զինվորների իրավունքների պաշտպանությանը, հայտարարեց պաշտպանության նախարար Սեյրան Օհանյանը:
Նա նշեց, որ ինքը Հայաստանի զինված ուժերում որդեգրված մարդակենտրոն գործունեությունը ամենաճիշտ ուղղությունն է համարում. «Մենք զինվորին տեսնում ենք ոչ թե որպես ռեսուրս, այլ որպես կոնկրետ գործոն, որը պետք է զինված ուժերում զարգանա` հենվելով իր պարտականությունների, պատասխանատվության, իր ունեցած իրավունքների վրա, վերադաստիարակվի եւ արժանի ՀՀ քաղաքացի վերադառնա մեր հասարակություն»:
Նախարարը հավելեց, որ լուրջ ծրագրեր են իրականացվում ինչպես պաշտպանության նախարարության, այնպես էլ Մարդու իրավունքների պաշտպանի, ԵԱՀԿ Մինսկի խմբի երեւանյան գրասենյակների կողմից: Նրա խոսքերով` այդ ծրագրերի շնորհիվ զինծառայողները կարող են ստանալ համապատասխան գիտելիքներ. «Հայաստանի Հանրապետությունում յուրաքանչյուր ընտանիք բանակում ունի իր դեսպանը, դա մեր զինվորներն են: Այդ զինվորները կապ են պահում իրենց հարազատների հետ եւ տեղեկությունների որոշ մասը մենք ստանում են ծնողների միջոցով: Մենք ձգտում ենք, որ մարդը լինի այն իրադարձությունների կենտրոնում, որն այսօր իրականացվում է Զինված ուժերի կողմից»:
Սեյրան Օհանյանն ասաց, որ պաշտպանության նախարարությունը 2014 թվականը
հայտարարել է փողոցային արատավոր բարքերի դեմ պայքարի տարի. «Միջանձնային հարաբերություններում խախտումների հիմնական պատճառ են հանդիսանում այդ արատավոր բարքերը, որոնք բերում են անհանդուրժողականության, այդտեղից էլ ծնվում են հանցագործությունները: Մեր ազգային անվտանգության ռազմավարության մեջ անհանդուրժողականության մթնոլորտը սպառնալիք է Հայաստանի Հանրապետության հասարակության համար, այսինքն` արատավոր բարքերի դեմ պայքարը մենք իրականացնում ենք ոչ միայն բանակում, այլեւ հասարակության հետ միասին»:
Կարդացեք նաև
Ամի ՉԻՉԱԿՅԱՆ
