«2014 թվականը պաշտպանության բանակի, ԼՂՀ-ի համար լարված տարի էր»,- այսօր` դեկտեմբերի 10-ին, լրագրողների հետ զրույցի ընթացքում նշեց պաշտպանության նախարար Սեյրան Օհանյանը:
Նա ասաց, որ մյուս տարիներից 2014 թվականն առանձնացել է տարբեր տիպի դիվերսիոն-հետախուզական գործողություններով, իսկ պաշտպանության բանակի ղեկավարության եւ զորամասերի խնդիրը ոչ միայն պաշտպանական խնդիրներ իրականացնելն է եղել, այլ նաեւ կանխարգելիչ միջոցառումներ իրականացնելը:
Հարցին, թե այսօր ի՞նչ վիճակ է սահմանում, Սեյրան Օհանյանը պատասխանեց, որ լարվածությունը մեկ բարձրանում է, մեկ՝ իջնում. «Նախկինում եթե պաշտպանության բանակի հատվածում նվազագույնը լինում էին կրակոցների 35-50 դրվագներ եւ օգտագործում էին 1000 փամփուշտ, այսօր այդ կրակոցների թիվը հասնում է 170-ի, 200-ի եւ փամփուշտների թիվը` 3000-ից մինչեւ 6000-ի: Պաշտպանության բանակի ստորաբաժանումները եւ հայկական զինված ուժերի ստորաբաժանումները միայն պատասխանում են դիպուկահարների կանոնավոր կրակոցներին, անկանոն կրակոցներին մենք հանգիստ ենք վերաբերվում եւ չենք պատասխանում: Իսկ եթե լինում են սադրանքներ, ապա մենք ձգտում ենք միայն չպաշտպանվել, այլ կանխել»:
Իսկ բանակցային գործընթացը, ըստ Սեյրան Օհանյանի, ընթանում է իր հունով. «Պայմանավորվածությունները քաղաքական մակարդակում իրականացվում են, պարզապես այս լարվածությունները տեղի են ունենում տարբեր գործընթացների, հատկապես հանդիպումների շրջանակում, եւ փորձվում է այս լարվածությամբ ազդել հայկական կողմի վրա: Ե՛վ արցախյան գոյապայքարի փորձերը, ե՛ւ այսօրվա փորձը ցույց են տալիս, որ արդեն իսկ այն նպատակները, որ մեր հարեւանների մոտ կար, այլեւս չի ազդում հայկական կողմի վրա: Մենք մեր տեսակետների տերն ենք. հարցը պետք է լուծվի քաղաքական ճանապարհով, խաղաղ պայմաններում՝ իհարկե՛, պաշտպանելով բոլոր միջազգային նորմերը»:
Ամի ՉԻՉԱԿՅԱՆ
