«Նաիրիտ» գործարանի երկարամյա աշխատակից տիկին Կարինեն զայրացած է. ճարահատյալ է բողոքի ցույցի դուրս եկել Կառավարության շենքի առաջ՝ պահանջելով իր աշխատավարձը: «Քանի տարի է՝ մեզ խաբում են, չի կարելի չէ՞, մարդ ենք»,- նեղսրտում է տիկինը: Նաեւ հավելում, որ իր աշխատավարձը ցածր է, 73000 դրամ, ու մեղավոր չէ, որ ուրիշները միլիոններ են կերել: Aravot.am-ի հետ զրույցում նաիրիտցին, որին գործընկերը բնորոշեց որպես հանրապետությունում «լավագույն ապարատչիկ», ասաց. «Ախր առողջական խնդիր ունեմ, մի կուրսը 400 000 դրամ է, ոնց անե՞մ, էս ինչ ցեղասպանություն է… Հաշմանդամության կարգ ունեմ, բայց դրա գումարով էլ չեմ կարող բուժվել, թող տան իմ աշխատավարձը, ոնց ապրենք… Լուսի փող, հացի փող, երեխեք ունեմ, թոռնիկ, համայնքը դուռը ծեծում է, երկու տարի է՝ փողը չեմ տվել, նամակ եմ գրել քաղաքապետին, թաղապետին, ի՞նչ անեմ»:
Գոհար ՀԱԿՈԲՅԱՆ
