«Իրատես de facto»-ի հարցերին պատասխանում է ԱԺ ՀՀԿ խմբակցության պատգամավոր Մարգարիտ Եսայանը
– Խորհրդարանի քաղաքական ուժերի համատարած ռուսամետությունը վտանգավոր չե՞ք համարում Հայաստանի համար։
– Ոչ, ես վստահ եմ, որ եթե խորհրդարանի դահլիճում քննարկվեր ոչ թե ԵԱՏՄ-ին միանալու համաձայնագիրը, այլ՝ եվրաասոցացման, բոլոր քաղաքական ուժերը եվրոպամետ կլինեին։
– Դա մեր թուլությո՞ւնն է։
Կարդացեք նաև
– Դա մեր ուժն է, աշխարհի շատ ժողովուրդներ, որ եղել են, այլևս չկան, իսկ մենք կանք ու հասել ենք 21-րդ դար, որը դաժանաբար դեռ չի ուզում մերը լինել, բայց այն մենք մերը կդարձնենք և շուտով։
– Տարեսկզբից քաղաքական ուժերը առաջադրեցին պահանջներ, որից իրենք էլ կարծես, հրաժարվում են, հոկտեմբերին երկու հանրահավաք արեցին ու գնացին տուն՝ նորից տուն ուղարկելով ժողովրդին։ Ինքնահաստատման փո՞րձ էր՝ ժողովրդի հաշվին, 2017-2018-ի նախապատրաստությո՞ւն:
– Թեպետ քաղաքական կյանքը մեռնում է հետընտրական ժամանակներում, բայց քաղաքական գործիչները պարտավոր են ակտիվ կեցվածք պահպանել։ Երեք-չորս քաղաքական ուժերը շատ լավ հասկացան, որ մնում են լուսանցքում։ Այդքանը։
Օրակարգում ունեինք պայմանագիր, որի քննարկմանը ոչ միայն մեր երկրում են հետևում, այլև՝ դրսում, ու Ձեր ասած բոլոր գործողություններով ոմանք փորձում էին իրենց կուսակցական ու անձնական խնդիրները լուծել։
Ի սկզբանե ակնհայտ էր, որ նրանք իշխանափոխության պահանջ չունեն, բառերով կոչեր արեցին ու, ժողովրդին էլ տուն ուղարկեցին, իրենք էլ տուն գնացին։ Բայց, մինչև տուն հասնելը, մատնացույց անելով հրապարակը, փորձեցին պայմանավորվածությունների հասնել իշխանության հետ։ Սա է քաղաքական դաշտի պերճանքն ու թշվառությունը։
Գուցե բնական է, որ քաղաքական ուժերը հետապնդում են նեղ կուսակցական շահեր, բայց այդ շահերի պաշտպանության ճանապարհին չի կարելի գործիք դարձնել ժողովրդին։ Չի կարելի մարդկանց տանել հրապարակ անգիր արած ճառերով կամ գիրկապ անելով՝ մի կերպ կարդալով այդ ճառերը՝ հույսեր ներշնչել, հետո նույնիսկ չասել՝ մենք մեր խնդիրները լուծեցինք, ազատ եք, ցրվեք։ Սա նշանակում է՝ դու չես հարգում ոչ քո ժողովրդին, ոչ ինքդ քեզ։ Ստացվում է, որ ժողովրդին ու հասարակությանը հարգում է միայն իշխանությունը, որ նրա հետ միշտ ազնիվ է ու ապարդյուն հույսեր չի ներշնչում, որ ասում է՝ մի գնացեք հրապարակ, ձեռնունայն հետ եք գալու։ Ասում են՝ իշխանությունը վախենում է, ինչի՞ց, իշխանությունը լավ հասկանում է՝ ով ինչ շահեր է հետապնդում, ու չի ուզում, որ ժողովուրդը հերթական հիասթափությունն ապրի, որ այն հնարավորությունը, որ իրականում ժողովրդական զանգվածն ունի, ցաքուցրիվ լինի։ Չի կարելի քոռուփուչ անել այդ էներգիան ու մնալ անպատիժ:
Անահիտ ԱԴԱՄՅԱՆ
Հարցազրույցն ամբողջությամբ կարող եք կարդալ «Իրատես de facto» թերթի այսօրվա համարում
