Armenia Today կայքի համակարգող Արգիշտի Կիվիրյանի գործով Քանաքեռ եւ Զեյթուն վարչական շրջանների ընդհանուր իրավասության դատարանում հարցաքննվեց լրագրող Լիլիթ Թադեւոսյանը:
Հիշեցնենք, որ Արգիշտի Կիվիրյանի դեմ հարուցվել է քրեական գործ ՀՀ քրեական օրենսգրքի 316-րդ հոդվածի 1-ին մասով (իշխանության ներկայացուցչի նկատմամբ կյանքի կամ առողջության համար ոչ վտանգավոր բռնություն գործադրելը կամ բռնություն գործադրելու սպառնալիքը): Ըստ մեղադրանքի, Արգիշտի Կիվիրյանը ոստիկանի նկատմամբ բռնություն է կատարել անցած տարի Կոմիտաս 5 –ում բարձրահարկ շինարարության դեմ բնակիչների բողոքի ակցիայի ժամանակ:
Հարցաքննվող լրագրողը դատարանում մանրամասն ներկայացրել է՝ ինչ պայմաններում է նկարահանում իրականացրել դեպքի օրը, ինչ է տեսել, եւ ով ինչ գործողություն է արել:
Փաստաբան Երվանդ Վարոսյանի պատմելով, տեխնիկական խնդիրների պատճառով այսօր չեն կարողացել դատարանում ուսումնասիրել Լիլիթ Թադեւոսյանի նկարած տեսանյութը, որտեղ հստակ երեւում էր՝ երբ, ինչպես են Կիվիրյանին բերման ենթարկել, եւ գործով որպես տուժող ներգրավված Վահան Վրթանեսյանի ագրեսիվ պահվածքը: Երվանդ Վարոսյանը նաեւ ասաց, որ հաջորդ դատական նիստին իրենք բարձրացնելու են Կիվիրյանին դեպքի օրը բերման ենթարկած մեքենայի հարցը: Դատարանը ավելի վաղ գրություն էր ուղարկել ճանապարհային ոստիկանություն, որ ներկայացվեր այն մեքենան, որով բերման էր ենթարկվել Կիվիրյանը. Նախատեսված էր մեքենան քննչական փորձարարության ենթարկել: Բայց ոստիկանությունն այդպես էլ չի արձագանքել դատարանի գրությանը:
Կարդացեք նաև
Արփինե ՍԻՄՈՆՅԱՆ
