Ազգությամբ թուրք ռեժիսոր Ֆատիհ Ակինը «Թըդեյս Զաման»-ին տված հարցազրույցում ասել է, որ Եղեռնի վերաբերյալ իր նկարահանած «Հատում» ֆիլմը ամենևին էլ ցեղասպանության մասին չէ:
«Ես պարզապես ուզում էի մի պատմություն պատմել, բայց այս պատմությունը հնարավոր չէ տեսնել պարզ ու շիտակ: Այնուամենայնիվ ես բարձրաձայն եմ ասում՝ այս ֆիլմը ցեղասպանության մասին չէ: Ֆիլմի վերաբերյալ բոլոր քննարկումներն ու հարցազրույցներն ամեն անգամ այդ ուղղությամբ են ընթանում», – ասել է ռեժիսորը՝ ավելացնելով, որ եթե ինքը ուզենար ցեղասպանության մասին ֆիլմ ստեղծել, ապա 12 ժամանոց վավերագրական ֆիլմ կնկարահաներ, որի պատումը կսկսվեր 10-րդ դարից:
Ի հեճուկս թուրք ազգայնականների, որոնք սպառնալիքներով էին վախեցնում ֆիլմը Թուրքիայում ցուցադրելու դեպքում, նոյեմբերի 5-ից թուրք հանդիսատեսը հնարավորություն ունի դիտելու այն Թուրքիայի կինոթատրոններում: Ակինի խոսքերով, իր առաջնահերթ նպատակներից էր Թուրքիայում ցուցադրելը և այլևս ոչ ոք նրան չի սպառնում:
Պատասխանելով հարցին, թե արդյոք նա 1915թ. դեպքերը ցեղասպանություն է համարում, գերմանաբնակ ռեժիսորն ասել է.
Կարդացեք նաև
«ՄԱԿ-ը ցեղասպանության սահմանումը տվել է 1948թ-ին … ու այն ինչ տեղի է ունեցել այս երկրում, համապատասխանում է այդ սահմանմանը: Եթե ընդունում ենք ՄԱԿ-ի հիմունքները, ապա այո, ես այն անվանում եմ ցեղասպանություն»:
Ակինը խոսել է նաև Գերմանիայում ֆիլմի արձագանքից՝ որպես երկիր, որը նույնպես ցեղասպանություն է իրագործել: Նրա ասելով, Գերմանիայում «Հատում»-ը խիստ քննադատության է արժանացել, քանի որ գերմանացիները չեն կարողացել նշմարել Հոլոքոստը հիշեցնող պատկերներ.
«Նրանք ակնկալում են Աուշվիցի (հրեաների համակենտրոնացման ճամբար Լեհաստանում) պես մի բան տեսնել ֆիլմում, երբ չեն տեսնում, քննադատում են այն: Մինչդեռ հայերի ցեղասպանությունը խորհրդանշող բազմաթիվ պատկերներ կան, բայց քանի որ նրանք դրանց մասին ոչինչ չգիտեն, քննադատում են», – ասել է նա և նշել, որ ընդհանուր առմամբ արևմտյան հանդիսատեսը գիտելիք չունի Հայոց ցեղասպանության մասին, ինչը նույնը չէ Հոլոքոստի դեպքում:
Պատրաստեց Հովհաննես ԻՇԽԱՆՅԱՆԸ
