«Ինձ մտահոգում է այն փաստը, որ 1500 էջանոց փաստաթղթի վրա այդքան կարճ ժամանակ քննարկում է կազմակերպվել»,-այսօր «Հայելի» ակումբում լրագրողների հետ հանդիպմանը անդրադառնալով ՀՀ-ի՝ ԵՏՄ անդամակցության պայմանագրի ԱԺ-ում վավերացման փաստին, այսպիսի կարծիք հայտնեց «Ազատ դեմոկրատներ» կուսակցության փոխնախագահ Անուշ Սեդրակյանը: Նա նկատեց, թե փոխարենը պետք էր վավերացման նախորդող ամիսը լիներ դեբատների և կարծիքների հրապարակման ու քննարկման ամիս:
Եզրափակելով՝ տիկին Սեդրակյանը նշեց, թե «մենք գտնվում ենք քաղաքական ֆիկտիվ միությունում, որի օգուտները ես չեմ տեսնում»:
ԱԺ կրթության, գիտության, մշակույթի, երիտասարդության եւ սպորտի հարցերի հանձնաժողովի նախագահ, ՀՀԿ խմբակցության պատգամավոր Արտակ Դավթյանը հակադարձեց. «Չի կարելի ցանկացած բան բացարձակացնել: Քսանհինգ տարի առաջ, երբ ուսանող էի, այն ժամանակ ավելի բոցաշունչ ելույթներ էինք լսում, թե մեզ ընդամենը պետք է ազատություն, թե արևմուտքը մեզ կտա ամեն ինչ և կարթնանանք, մեր գլխին երկնային մանանա կթափվի: Մեզ այնքան իմաստնություն չի տրվել, որ մենք մեր տնտեսական կապերը չխզեինք»:
Որպես հակափաստարկ՝ պարոն Դավթյանը նշեց, թե արևմուտքի շուկայի մուտքը որևէ մեկին արտոնված չէ, մանավանդ այնպիսի աղքատ բարեկամի կարգավիճակ ունեցողի, ինչպիսին Հայաստանն է:
Կարդացեք նաև
ՀՀԿ-ական պատգամավորը օրինակ բերեց, թե ասենք Ռումինիային, Բուլղարիային և մյուս երկրներին ի՞նչ է տվել Եվրամիությունը, «որևէ լավ բան չեն ստացել Եվրամիությանը անդամակցելիս»:
Արձագանքելով կարծիքին, թե ինչու նախապես քննարկումներ չեն կազմակերպվել, պարոն Դավթյանը նկատեց. «ՀՀ-ն չի փայլում տնտեսագիտական մտքով, քննարկում քննարկումների համար արվեր, դա ոչինչ չէր տա»:
Անուշ Սեդրակյանը, հակադարձելով այն կարծիքին, թե այնքան իմաստնություն չունեցանք, որ մեր կապերը պահպանեինք, ասաց. «Ի՞նչ կապեր պահպանեինք, երբ Խորհրդային միությունը փլուզվեց…հիմա ունենում ենք ազատություն և միևնույն ժամանակ անբարեկեցություն»:
Այնուհետև մտահոգություն հայտնեց, թե արևմուտքից եկած օգնությունը ինչու շորթվեց. «Եթե այդ օգնությունը չի բավարարել որոշ մարդկանց հարստացման բավարարմանը, ապա չի նշանակում, որ օգնություն չի եկել»:
Տիկին Սեդրակյանը հարցրեց, ռուսական 500 միլիոնանոց վարկը տեղ հասա՞վ, պարոն Դավթյանն այդպես էլ հստակ պատասխան չտվեց:
Տաթև ՀԱՐՈՒԹՅՈՒՆՅԱՆ
