Քրչիկը հայկական խոհանոցի հայտնի ապուրներից է, եւ քանի որ բուսական բաղադրություն ունի, շատ լավ պահքի ուտեստ է: Սակայն ի՞նչն է խանգարում այն դարձնել ոչ պահքի, բուսական յուղի փոխարեն եփելով, ասենք՝ տհալով (ղավուրմա)՝ յուղը եւ միսը միասին ավելացնելով ապուրին: Այդպես ե՛ւ ավելի սննդարար կլինի, ե՛ւ մսակերների համար ավելի համեղ: Սակայն հիշեք, որ իրական բաղադրատոմսում քրչիկը պատրաստվում է բուսական յուղով:
Անհրաժեշտ մթերքները
թթու կաղամբ- 200-300 գրամ
սոխ-2 գլուխ
կարտոֆիլ- 2 հատ
ցորենի ձավար (կամ մանր բլղուր)- 2 ճաշի գդալ
լոլիկի մածուկ-2 ճաշի գդալ
բուսական յուղ- 3-4 ճաշի գդալ
(կամ տհալ` 100 գրամ)
թարմ կանաչի
Պատրաստման եղանակը
Կարդացեք նաև
Բուսական յուղը (կամ տհալը) կաթսայի մեջ տաքացնել, ավելացնել սոխը: Երբ սոխը բավականաչափ դաղվի, ավելացնել տոմատի մածուկ (եթե չունեք, կարող եք ավելացնել լեչո՝ կրկնապատկելով քանակը), լավ խառնել, ավելացնել մանր կտրատած թթու կաղամբը, թողնել մի հինգ-տաս րոպե շոգեխաշվի: Ապա վրան լցնել եռացրած ջուր, ավելացնել մաքրած եւ կտրատած կարտոֆիլը, թողնել եփվի, մինչեւ կարտիֆիլը գրեթե պատրաստ կլինի: Վերջում ավելացնել բլղուրը: Եթե խոշոր ձավար եք ավելացնելու, մի քիչ ավելի շուտ գցեք, որ հասցնի եփվի:
Մատուցելիս ավելացրեք նաեւ թարմ կանաչի:
Ես այս ապուրի մեջ նաեւ սալորաչիր եմ գցում, թեեւ բաղադրատոմսով նախատեսված չի: Սալորաչիրը սովորաբար ապուրները թթվաշացնելու համար են գցում, բայց այս թթու ապուրին այն հակառակը, հաճելի քաղցրահամ է տալիս:
Բարի ախորժակ:
Պատրաստեց
ՄԵԼԱՆՅԱ ԲԱՐՍԵՂՅԱՆԸ
«Առավոտ»
06.12.2014
