«Այս հայտարարությունը հերթական սպեկուլյացիան է, իրենց մասին հիշեցնելու, արևմուտքին հիշեցնելու, որ այստեղ ճնշված են և աջակցության կարիք ունեն, անկախական շարժումը պառակտելու նպատակ»,-Aravot.am-ի հետ զրույցում անդրադառնալով այն հայտարարությանը, որտեղ դատապարտվում էր այն, որ Արմեն Հովհաննիսյանը լրագրող Գայանե Առուստամյանի հասցեին սեռական հայհոյանքներ է հնչեցրել, հարձակվել նրա վրա, այսպես պատասխանեց «Հայազն» կուսակցության վարչության անդամ Արմեն Հովհաննիսյանը:
Հիշեցնենք, որ քաղաքացիական հասարակության մի շարք ներկայացուցիչներ և կազմակերպություններ այսօր հայտարարություն են տարածել, որտեղ մասնավորապես ամրագրված է. «ԱԺ-ում ԵՏՄ պայմանագրին միանալու մասին փաստաթղթի վավերացման դեմ հանրային բողոքի գործողությունների ռազմավարությունը քննարկելու նպատակով դեկտեմբերի 1-ին ՀՌԱԱՀ գրասենյակում հավաքված մի շարք հասարակական կազմակերպությունների, կուսակցությունների ներկայացուցիչների եւ անհատ քաղաքացիների ներկայությամբ ազգայնական «Հայազն» կուսակցության վարչության անդամ Արմեն Հովհաննիսյանը` ԵՄ դրոշով ակցիային մասնակցելու առաջարկությամբ հանդես գալու համար՝ լրագրող, հասարակական ակտիվիստ Գայանե Առուստամյանի հասցեին նախ սեռական բռնության սպառնալիք և հայհոյանքներ է հնչեցրել, այնուհետև տեղից վեր է կացել և հարձակվել նրա վրա: Գայանե Առուստամյանը հարկադրված է եղել դիմելու ինքնապաշտպանության, իսկ Արմեն Հովհաննիսյանը և նրա կուսակիցները դուրս են հրավիրվել տարածքից»:
Արմեն Հովհաննիսյանը չցանկացավ մանրամասն պարզաբանումներ ներկայացնել ու ասաց. «Իրենք, որքան գիտեմ, դիմել են նաև ոստիկանություն: Ես պարզաբանումները կտամ օրենքի համաձայն, որտեղ պետք է և ինչպես պետք է: Մամուլին ասելիք չունեմ, քանի որ սա արդեն լրիվ ուրիշ շրջանակների երևույթ է»: Մեր հարցին՝այն, ինչ նկարագրված է հայտարարության մեջ, համապատասխանո՞ւմ է իրականությանը, պարոն Հովհաննիսյանը պատասխանեց. «Ի՞նչ եք սպասում, որ ես պատասխանեմ. իհարկե, ոչ: Հիմա, եթե ես սկսեմ բացատրություն տալ, թե ինչը՝ այո, ինչը՝ ոչ, մենք կանցնենք մանր քննարկումների դաշտ, բայց ես կցանկանայի դրանից խուսափել»: Այնուհետև պարոն Հովհաննիսյանն ասաց, թե սա առաջին դեպքը չէ, որ հայազնականների հետ նման բան է եղել ու մանրամասնեց. «ՀՀ ոստիկանությունը երկար քննություն է իրականացրել ու պարզել, որ ոչինչ չկա դրա տակ: Սա արդեն երկրորդ դեպքն է, նմանատիպ եղել են դեպքեր ու կլինեն, ես դրան սովոր եմ և շատ հանգիստ եմ վերաբերվում այդ ամենին: Թող այս անգամ էլ իրականացվի մանրամասն քննություն: Այնտեղ եղել է տասից ավելի վկա, այնպես որ, այդ ամենը գաղտնիք մնալ չի կարող»:
Տաթև ՀԱՐՈՒԹՅՈՒՆՅԱՆ
Կարդացեք նաև
