Police.am Նախկինում դատապարտված Գարիկ Օհանյանը մեղադրվում է համացանցով մարդկանց հետ ծանոթանալու, այնուհետեւ նրանցից գողություն կատարելու մեջ:
Նոյեմբերի 12-ին ոստիկանության Քանաքեռ-Զեյթունի բաժնում ահազանգ է ստացվել, որ Գոգոլի փողոցի շենքերից մեկում կապկպված տղամարդ կա: Մեկնելով դեպքի վայր՝ ոստիկանները բացահայտել են, որ 34-ամյա տղամարդու ձեռքերն ու ոտքերը կապկպել է վերջինիս ծանոթներից մեկը՝ ոմն Արտյոմ: Պարզվել է, որ նրանք ծանոթացել են սոցիալական կայքերից մեկի միջոցով, ծանոթությունը նշելու համար տուժած տղամարդը Արտյոմին հրավիրել է իրենց տուն, միասին խմել են, որից հետո Արտյոմը կապկպել է տանտիրոջը, նրանից հափշտակել բջջային հեռախոս ու համակարգիչ ու դիմել փախուստի:
Նոյեմբերի 27-ին ոստիկանները բացահայտել են գողությունը կատարած անձին՝ Գարիկ Օհանյանին, եւ բերման ենթարկել:
Փաստի առթիվ հարուցվել է քրեական գործ: Գարիկ Օհանյանը կալանավորված է:
