«Նոր շենքերը կառուցվածքային առումով ճիշտ են լուծվում, քանի որ մոնոլիտ են, կայուն, բայց մի խոշոր թերությունով ենք դա անում: Չենք կարողանում առանց թերությունների կառուցել: Երևանի կենտրոնը շատ խիտ է կառուցապատված»,-այսօր «Հենարան» ակումբում լրագրողների հետ հանդիպմանը դեկտեմբերի 7-ին ընդառաջ խոսելով Երևանի սեյսմակայունությունից՝ այսպիսի կարծիք հայտնեց Ճարտարապետների միության նախագահ Մկրտիչ Մինասյանը: Նա, շարունակելով մտահոգությունը Երևանը «պաշարած» էլիտար շենքերի սեյսմակայունության առիթով, շարունակեց. «Չի կարելի երկրաշարժային գոտիներում նման խտությամբ կառուցել: Այդ շենքերին մոտենալ է պետք: Օրինակ՝ Անի թաղամասում Անի հյուրանոցն է կառուցված, այդ հատվածը շատ խիտ է կառուցապատված, հիմա էլ մի բարձրահարկ հյուրանոց են կառուցում: Երևանի կենտրոնում կառուցապատման խտությունը մեզ մոտ մեծ է»:
Պարոն Մինասյանը նշեց, թե շենքերի բակերը պետք է ազատ լինեն, որ երկրաշարժի դեպքում մարդկանց հնարավոր լինի տարհանել:
Այս վիճակով ըստ ճարտարապետների միության նախագահի՝ Երևանը սեյսմակայուն է 7 բալանոց երկրաշարժի պարագայում, ավելիի դեպքում Սպիտակից ավելի վատ վիճակում կարող է հայտնվել:
Պարոն Մինասյանը կարևորեց նաև շենքերի ամրակայման հարցը ու նշեց, որ դա պետք է լինի երկարաժամկետ ծրագիր և միլիարդավոր դոլարներ է պահանջում: Այնուհետև տեղեկացրեց, որ այժմ պետականորեն ծրագիր է գրվում այս խնդիրը կազմակերպելու համար:
Կարդացեք նաև
Տաթև ՀԱՐՈՒԹՅՈՒՆՅԱՆ
