ԵՄ անդամ երկրների ներկայացուցիչները Հայաստանի՝
ԵՏՄ-ին անդամակցության որոշման վերաբերյալ չեն կարողանում թաքցնել իրենց զարմանքը:
«Հայաստանի որոշումը շոկային էր Բրյուսելի համար, քանի որ ՀՀ-ն մեկ գիշերվա մեջ որոշեց անդամակցել Եվրասիական տնտեսական միությանը»,- «Առավոտի» հետ զրույցում ՀՀ արտաքին քաղաքականության ոլորտում վերջին տարվա ընթացքում կատարված սկզբունքային փոփոխությունների մասին խոսելով՝ այսպիսի կարծիք հայտնեց Լեհ-ուկրաինական համագործակցության հիմնադրամի տնօրեն Յան Պյեկլոն:
Պարոն Պյեկլոն եւս զարմացած է, թե այդ ինչպե՞ս եղավ, որ նման հապճեպությամբ ՀՀ ղեկավարը որոշեց մի կողմ թողնել սեղանին դրված համաձայնագրի՝ Ասոցացման համաձայնագրի ստորագումը: Յան Պյեկլոն այս հարցում նման եզրահանգման է եկել. «Դա Ռուսաստանի շանտաժի արդյունքն էր: Որպես գործիք օգտագործելով Արցախը՝ Ռուսաստանը Հայաստանին համոզեց մուտք գործել Եվրասիական տնտեսական միություն»:
Յան Պյեկլոն նշեց, թե այցելել է Հայաստան եւ այնպիսի տպավորություն ստացել, որ հիմնականում քաղաքացիական հասարակությունը ուրախ չէ այդ անդամակցությամբ: Մեր զրուցակիցը հավելեց. «Հայաստանում քաղհասարակության ներկայացուցիչներն ունեն սեփական դիրքորոշում ու ձայնի իրավունք: Բայց նրանք երջանիկ չեն այս որոշմամբ»: Լեհ գործչի կարծիքով՝ Հայաստանին այս իրավիճակում միայնակ թողնելը կլինի ամենասխալ մոտեցումը, ընդհակառակը՝ անհրաժեշտ է համագործակցության նոր եզրեր եւ ձեւաչափեր փնտրել:
Յան Պյեկլոն զուգահեռներ անցկացրեց նաեւ Ուկրաինայում իրավիճակի վերաբերյալ:
Մեր հարցին՝ Ուկրաինայի ընտրած ուղին լավագո՞ւյնն էր, պարոն Պյեկլոն պատասխանեց. «Ուկրաինան հիմա բաց կոնֆլիկտի մեջ է Ռուսաստանի հետ, ու այժմ այդ երկրի համար ամենակարեւորը սահմանների պաշտպանությունն է՝ երկրի ինքնիշխանությունը պահպանելու համար»: Լեհ գործիչը հիշեցրեց, որ ամեն ինչ սկսվեց, երբ Ուկրաինայի այն ժամանակվա նախագահը՝ Յանուկովիչը, չցանկացավ ստորագրել Ասոցացման համաձայնագիրը, ինչին ընդդիմացավ ժողովուրդը, եւ պայքարը սկսեց ուսանողությունը: Ըստ Յան Պյեկլոյի՝ Ուկրաինան լավագույն օրինակն է, որը ցույց է տալիս, թե ժողովուրդն ինչպիսի քայլերի կարող է դիմել, երբ ղեկավարները հրաժարվում են հաշվի առնել հասարակության կարծիքը:
Կարդացեք նաև
Լեհաստանի առջեւ եւս ծառացած են որոշ խնդիրներ: Դրանցից որոշները, ինչպես փոխանցեց Յան Պյեկլոն, կապված են Եվրամիության քաղաքական եւ տնտեսական ճգնաժամի հետ: Երկրում կա նաեւ ռուսական միջամտության վտանգ: Պարոն Պյեկլոն ասաց. «Եվրոպական միության քաղաքական եւ տնտեսական ճգնաժամի պարագայում Բալթյան երկրների անվտանգության խնդիր կա: Մանավանդ, որ նկատվում են Ռուսաստանի ձգտումները՝ ապակայունացնել Բալթյան երկրներում իրավիճակը»:
ՏԱԹԵՎ ՀԱՐՈՒԹՅՈՒՆՅԱՆ
«Առավոտ» օրաթերթ
5.12.2014
Конечно,г Пьекло, какое Вам дело до погибших женщин, детей и стариков,разрушенных судеб,городов в Донбассе? Главное,что бы Вам тоже предложили какую-нибудь должность на Украине!! А почему не пускаете этих самих украинцев в Европу? Почему ужесточили визовый режим? Почему не говорите о веерных отключениях? И это только начало!(((((((((((((( Вы и для нас подготовили такую “счастливую” жизнь, когда требовали немедленно закрыть АЭС? Или Вы не в курсе? А что хорошего случилось в жизни украинцев? Назовите хоть одно! Пожалуйста!!!