Որքան էլ կառավարությունից ասեն, թե գնաճը ընդամենը 5 տոկոս է, ՕԵԿ-ը չի հավատում: Այսօր ԱԺ ճեպազրույցի ժամանակ ՕԵԿ պատգամավոր Մհեր Շահգելդյանն ասաց, որ միայն սննդամթերքի գների 10 տոկոս գնաճ է նկատում ՕԵԿ-ը. «Դրամի արժեզրկումն ազդում է գնաճի վրա: Քաղաքացիների մի մեծ հատված վարկեր են վերցրել, մարդիկ տոկոսի տակ են: Կան կետեր, որ եթե այս տարբերությունը բավականաչափ մեծ է լինում, ապա այն փոխվում է հօգուտ բանկի, խոսքը վերաբերում է դոլարային վարկերին: Քաղաքացիները կարող են խնդրի առաջ կանգնել, մարդիկ կարող են բանկային պայմանագրերից ընկնել էլ ավելի ծանր վիճակի մեջ»:
Ըստ Մհեր Շահգելդյանի, «Եղել են ԿԲ նախագահի, փոխնախագահի հայտարարությունները, բայց մարդկանց կոնկրետ պատասխան է ակնկալում՝ ի՞նչ միտումներ են սպասվում, մարդիկ սկսում են աղքատանալ զանգվածաբար: Պետք է պատկան մարմիններն ասեն, թե իրենք ինչ են նախատեսում: Մենք կարծում ենք, սա անհրաժեշտ է: Պետք է բաց խոսեն քաղաքացիների հետ, իրավիճակը պետք է կանխատեսելի լինի»:
Պարոն Շահգելդյանն ասաց, որ փոխարժեքի այս տատանումներն ազդելու են նաեւ բյուջեի մուտքերի եւ սոցիալական խնդիրների վրա: Նա առաջարկեց ԱԺ-ում լսումներ կազմակերպել այդ թեմայով. «Սա տանում է մարդկանց աղքատացման, միանշանակ, այս գործընթացը պետք է կասեցվի»:
Հռիփսիմե ՋԵԲԵՋՅԱՆ
