«Եռյակի քաղաքական նպատակը երբևէ արտաքին քաղաքական ծիրը չի եղել»,-այսօր «Փաստարկ» մամուլի ակումբում լրագրողների հետ հանդիպմանը՝ անդրադառնալով այն հարցին, թե ԵՏՄ անդամակցության պայմանագրի վավերացումն ի՞նչ ազդեցություն կունենա ՀՀ ներքաղաքական կյանքի վրա, այսպես պատասխանեց ՀՀԿ խմբակցության պատգամավոր Խոսրով Հարությունյանը:
Նա նկատեց, թե եռյակի շարժումը կոնկրետ անձի շարժում է, որը հեռանկար չի ունենալու ու նշեց. «Մեր ընդդիմությունը ձախողել է նրա համար, որ պայքարել է կոնկրետ մեկի՝ անձի համար»:
Ըստ Խոսրով Հարությունյանի՝ եռյակը իրականում ԲՀԿ-ն է՝ իր ավելի ընդլայնված կազմը ու հավելեց. «Մենք հոկտեմբերի 10-ին և 24-ին ականատես ենք եղել ԲՀԿ ընդլայնված կազմով հանրահավաքներին: Եռյակում երկու ուժերը փորձում են սեփական քաղաքական նպատակներին հասնելու համար օգտագործել ԲՀԿ և ֆինանսական, և քաղաքական և այլ ռեսուրսները:Եվ պատահական չէր, որ ԲՀԿ-ն մարտավարական մոդել փոխեց: Չհամաձայնվել ԲՀԿ-ի հետ նշանակում էր հայտնվել մարգինալ վիճակում: Սա վերաբերում է ՀԱԿ-ին ու «Ժառանգությանը»: ԲՀԿ-ն ինչ ասի, նրանք միգուցե կբանավիճեն, բայց վերջում, ԲՀԿ-ի ասածը կլինի»:
Խոսրով Հարությունյանի կարծիքով՝ ԲՀԿ-ն բոլորովին էլ չի պատրաստվում արտահերթ ընտրությունների: Պարոն Հարությունյանը նկատեց, թե եռյակի ուժերին միակ միավորող՝ «ցեմենտող», բանը Սերժ Սարգսյանն է: Հարցին՝ այդ դեպքում նրանք ինչու՞ չմիացան Նիկոլ Փաշինյանի՝ Սերժ Սարգսյանի իմպիչմենտի գործընթացին, Խոսրով Հարությունյանը պատասխանեց. «Այս նախաձեռնությունը որևէ հեռանկար գոնե ԱԺ-ում չէր կարող ունենալ: Դա ոչ այնքան Սերժ Սարգսյանի, այլ ընդդիմության դեմ է ուղղված: Նիկոլ Փաշինյանը փորձում է ընդդիմության մեջ ասել, որ ժողովուրդ՝ ընդդիմության մեջ ամենաջերմեռանդ ընդդիմադիրը ես եմ:
Կարդացեք նաև
Խոսելով Րաֆֆի Հովհաննիսյանի գործունեության, մասնավորապես քաղաքացիական քննարկումների անցկացման մասին, պարոն Հարությունյանն ասաց. «Րաֆֆի Հովհաննիսյանը լավագույն իր հնարավորությունն այլևս կորցրել է»:
Տաթև ՀԱՐՈՒԹՅՈՒՆՅԱՆ
