«Ժառանգության» առաջնորդ Րաֆֆի Հովհաննիսյանն այսօր Գյումրիում մեկ անգամ ևս կրկնեց, որ «Ժառանգություն»-ը դեմ է Հայաստանի՝ Եվրասիական տնտեսական միության անդամակցմանը: Ըստ նրա, այն հակասահմանադրական է, սպառնալիք է մեր անկախությանը: «Ես համարում եմ, որ ԵՏՄ-ն մեր անկախության, ինքնիշխանության զիջում է, և տնտեսական առումով շատ շուտով պիտի տեսնենք, եթե այսօր չենք զգում, որ այդ սխալ որոշումը պիտի մտնի շարքային գյումրեցու, շիրակցու, հայաստանցու գրպանը: Պիտի տեսնենք, թե մենք ինչպես ենք նաև աղքատացնում սեփական ժողովուրդը, որովհետև վախկոտ ենք, որովհետև ամերիկացուն, ռուսաստանցուն չենք կարող ասել՝ ներողություն, ոչ , մենք ձեզ հարգում ենք, բայց ներողություն՝ ոչ: ԵՎ այս դեպքում մենք տնտեսական ինքնուրույնությունն ենք արդեն կորցնում: Պատկերացրեք, որ վաղը մյուս օրը մենք ուզում ենք Պարսկաստանի սահմանին տնտեսական ազատ գոտի ստեղծել կամ Միջին Արևելքի հետ, չենք կարող, մեկ ուրիշը պիտի որոշի»:
Ըստ Րաֆֆի Հովհաննիսյանի, մենք պիտի հասկանանք մեր շահը, որովհետև աշխարհը հիմնված է շահի վրա: «Իսկ Ռուսաստանը հիմա գնացել է Թուրքիա՝ բարձրագույն մակարդակով և Թուրքիայի հետ իր հարցը լուծում է: Չեմ քննադատում, դա իր խնդիրն է, բայց մենք էլ մեր խնդիրը ունենք: Եվ մենք պիտի կարողանանք շատ ավելի խելացի, շատ ավելի իրավական, շատ ավելի անկախ և սահմանադրական մեր հանրապետության խնդիրները լուծել»: Րաֆֆի Հովհաննիսյանը մեկ անգամ ևս կրկնեց, որ ինքը ռուս ժողովրդի ու քաղաքակրթության հանդեպ մեծ հարգանք ունի, բայց չի գտնում, որ մենք պիտի ենթարկվենք որևէ մեկին,այդ թվում նաև ամերիկացուն:
Մանրամասները՝ տեսանյութում
Նունե ԱՐԵՎՇԱՏՅԱՆ
