ԱԺ-ի դիմաց առավոտից հավաքված մի խումբ ակտիվ քաղաքացիներ այս պահին դեռ շարունակում են ամոթանք տալ ԱԺ-ից դուրս եկող ու քիչ առաջ ԵՏՄ-ին Հայաստանի անդամակցության մասին պայմանագրին կողմ քվեարկած պատգամավորներին:
«Մեր պատգամավոր հորջորջվող ստրուկները վավերացրին մեր ինքիշխանությունը վաճառելու փաստաթուղթը: Ընդդիմադիր ուժերն էլ կողմ քվեարկեցին, որովհետեւ միայն իրենք են իրենց ընդդիմադիր համարում: Այդ ոչ իշխանական ուժերը վավերացրին մի փաստաթուղթ, որը ստորագրել էր Սերժ Սարգսյանը, այնինչ, նրանք իբր թե Սերժ Սարգսյանի իշխանության դեմ էին պայքարում: Այս քվեարկությունը քվեարկություն էր Սերժ Սարգսյանի ու նրա կայացրած որոշման օգտին. Հայաստանը հանձնել Ռուսաստանին ու Հայաստանը տանել դեպի գաղութացում»,- Aravot.am-ին ասաց լրագրող Գայանե Առուստամյանը:
Նրա պատմելով, ԱԺ-ից դուրս եկող պատգամավորներին շարունակում են դավաճան անվանել, բայց «Նրանց վրա չի ազդում նույնիսկ դավաճան վանկարկումը: Հենց նոր Շուշան Պետրոսյանը դուրս էր եկել, կանգնել էր ընդունարանի դիմաց ու չքմեղացած լսում էր, թե ինչպես են իրեն դավաճան ու Պուտինի ստրուկ անվանում: Ոչ մի ռեակցիա: Որոշները ցինիկաբար վիրավորում են մեզ` ասելով, թե մեր թվաքանակը քիչ է ու չենք արտահայտում ամբողջ ժողովրդի կարծիքը: Իսկ պատգամավորներից մեկը շատ կարճ կտրեց, դուրս եկավ ու մեր հարցին, թե ինչու է կողմ քվեարկել մեր երկիրը դեպի գաղութացում տանող փաստաթղթի օգտին, ասաց` աչքներդ էլ հանել եմ»:
Անդրադառնալով առավոտյան ԱԺ- մոտ իրեն «համբալ, ոչխար» անվանած Սամվել Ալեքսանյանի պահվածքին, ասաց.«Սամվել Ալեքսանյանից միայն գռեհկություն է սպասելի: Նույն ինքը՝ «Լֆիկը» այլ բառապաշար չունի»:
Կարդացեք նաև
Գայանե Առուստամյանը նաեւ քաղաքացիներին կոչ արեց դուրս գալ փողոց ու սկսել հեղափոխություն:
Արփինե ՍԻՄՈՆՅԱՆ
