Aravot.am-ի հետ զրույցում «Մուշ» ընկերության տնօրեն Բորիս Ներսիսյանը, որի ընկերության անունն այս օրերին շրջանառվում է որպես Եղվարդի թիվ 1 մանկապարտեզին նրբերշիկ մատակարարող, ասաց, որ «Մուշ» ընկերությունից տարբեր մատակարարներ են մսամթերք գնում, այդ թվում՝ եւ նրբերշիկ, բայց թե մանկապարտեզի այդ մատակարարը նրբերշիկը կոնկրետ մանկապարտեզին, թե մեկ այլ ընկերությանը մատակարարելու համար է գնել, չի կարող ասել:
Պարոն Ներսիսյանը մեզ հետ զրույցում վկայակոչեց առողջապահության նախարարի
թիվ 42-Ն հրամանը, որով նախադպրոցական ուսումնական հաստատություններում չի թույլատրվում օգտագործել երշիկեղեն: Այդուհանդերձ, «Մուշ»-ի տնօրենը տեղյակ չէր իր նրբերշիկը մատակարարվել է Եղվարդի մանկապարտեզ, թե` ոչ:
Այսօր Aravot.am-ի խմբագրությունը մի քաղաքացուց նամակ է ստացել, որտեղ Եղվարդի մանկապարտեզի գործունեությանը քաջածանոթ անձը վստահեցրել էր, որ «Մուշ» ՍՊԸ-ն նրբերշիկ չի մատակարարել: Ըստ նամակագրի` «Այս մանկապարտեզում տարիներ շարունակ խայտառակ խառնաշփոթ է եղել, աշխատակիցներն անգամ տանից պահածոներ են բերել եւ իրացրել երեխաների վրա: Աշխատողների մեծ մասն այստեղ մասնագիտական կրթություն չունի: Երբ մի քանի տարի առաջ այս հարցը բարձրացրեցինք ԿԳՆ-ում, տնօրենն ու մանկապարտեզի աշխատողներն իրար հետ նորից «լեզու գտան» եւ հարցը նորից փակվեց:
Կարդացեք նաև
Որտեղի՞ց է նրբերշիկը հայտնվել երեխաների սեղանին: Համոզված եմ, եթե մենք չմիջամտենք, այս հարցը շատ կարճ ժամանակահատվածում իրենց հարմար ձեւով լուծում կստանա համայնքում: Եվ մեղավորները կշարունակեն աշխատել նորից երեխաների հետ»:
Բորիս Ներսիսյանը մեզ հետ զրույցում նաեւ ասաց, որ այս օրերին սննդի անվտանգության պետական ծառայությունն իր արտադրամասում ստուգումներ անում է, սակայն դրանք պատճառաբանել է պլանային ստուգումներով: Նաեւ ասաց, որ Եղվարդի քննչականն է «Մուշ» ՍՊԸ-ից փաստաթղթեր պահանջել:
«Ես ոչ մի հիմք չունեմ, որ պնդեմ՝ այդ մատակարարը մեր նրբերշիկները մատակարարել է մանկապարտեզին կամ չի մատակարարել, բայց որ խնդիրը նրբերշիկի հետ ոչ մի կապ չունի, մեզ համար միանշանակ է»:
Հիշեցնենք, որ Եղվարդի մանկապարտեզում զանգվածային թունավորման մասին հայտնի էր դարձել նոյեմբերի 28–ի երեկոյան։ Ծանր վիճակում Երեւանի եւ Եղվարդի հիվանդանոցներ էին տեղափոխվել 100-ից ավելի երեխաներ: Ավելի ուշ պարզվել էր, որ երեխաների թունավորման պատճառը դիզենտերիայի հարուցիչն է, որն անցել էր երեխաների սննդի մեջ: Ներկայումս Քննչական կոմիտեն այս դեպքի առիթով քննություն է իրականացնում:
Լուսինե ԲՈՒԴԱՂՅԱՆ
