«2015-ի բյուջեի նախագծում մենք չենք տեսնում բյուջեի նախագիծ, որն ուղղված է երկրում տնտեսական աճի խթանմանը և սոցիալական խնդիրների լուծմանը»,-այսօր ՀՀ ԱԺ-ում «Բյուջե 2015»-ի քննարկման ժամանակ հայտարարեց ՀՀ ԱԺ ՕԵԿ խմբակցության ղեկավար Հեղինե Բիշարյանը: Տիկին Բիշարյանը նշեց, թե մենք չենք կարող բավարարվել 4 տոկոս աճով, որը կանխատեսել է կառավարությունը 2015-ի համար` այն էլ լավագույն պայմաններում է առաջարկում, իսկ ի՞նչ կլինի այն պարագայում, երբ օր օրի արժեզրկվում է դրամը, թանկանում մթերքները:
Հեղինե Բիշարյանը հայտարարեց, որ «դեմ են» քվեարկելու «Բյուջե 2015» նախագծին:
ՀԱԿ խմբակցության ղեկավար Լևոն Զուրաբյանը հայտարարեց. «Բյուջեի նախագիծը գրված է մեկ դոլարի համար 411 դրամի հաշվարկով, բայց այսօր ֆիքսենք, որ պաշտոնական կուրսը դարձել է 444 դրամ: Գտնվում ենք դինամիկ զարգացող ճգնաժամի մեջ, որը դեռ կարգավորված չէ: Սև շուկայում դոլարի գինը հասել է 485 դրամի: Ընդհանրապես ՀՀ-ում սև շուկայի հասկացություն չի եղել: Բանկերի վրա սահմանափակումներ են դրված դոլարի վաճառքի առումով: Սա նշանակում է, որ ճգնաժամը բավականին լուրջ է, և դոլարի լողացող կուրսի մասին պատրանքներ չստեղծեք»:
Ամփոփելով պարոն Զուրաբյանն ասաց, որ «դեմ» են քվեարկելու բյուջեի նախագծին ու դիմելով ՀՀ կառավարությանը` եզրափակեց. «Ձեր պաշտոնավարումը սպառնալիք է ոչ միայն ձեզ, այլև ամբողջ ազգին»:
Կարդացեք նաև
ԲՀԿ խմբակցության պատգամավոր Միքայել Մելքումյանը հայտարարեց. «Թող գնաճը լինի 10 տոկոս, բայց թող մարդկանց եկամուտներն աճեն 15 տոկոսով, մարդիկ այսօր ուզում են ապրել, չեն կարող սնվել համատարած խոստումներով»: Պարոն Մելքումյանն ասաց, որ իրենք ևս «դեմ են» քվեարկելու: Այս հայտարարությանը ՀՀ ԱԺ նախագահ Գալուստ Սահակյանը արձագանքեց. «Սկզբից ասեիր, էլի»:
ՀՀԿ խմբակցության ղեկավար Վահրամ Բաղդասարյանը կարճ ելույթ ունեցավ` «դեկլարատիվ և պոպուլիստական ելույթներին չանդրադառնալով»: Սակայն սկզբում շփոթվեց` նշելով, որ «1915-ի բյուջեն իրատեսական է»:
Նրա ելույթի ժամանակ նիստերի դահլիճում աղմուկ բարձրացավ: Վահրամ Բաղդասարյանը դիտողություն արեց. «Պարոն Հակոբյան»: Գալուստ Սահակյանն էլ արձագանքեց. «Էդ ինչո՞ւ եք ակտիվացել»:
Այնուհետև ի պատասխան Ռուբեն Հակոբյանի այն հայտարարությանը, թե հեռացեք իշխանությունից, պարոն Բաղդասարյանն ասաց. «Պարոն Հակոբյան, պատկերացնում եք, եթե դու ու Րաֆֆին լինեիք մեր և ժողովրդի ճակատագիր որոշողը, որևէ հաշվետվություն տվե՞լ եք, թե ինչ կկատարվեր ժողովրդի հետ: Իհարկե, ուրախ ենք, որ դուք չեք»:
Խորհրդարանը քվեարկության դրեց «Բյուջե 2015»-ի նախագիծը: Խորհրդարանը 71 «կողմ», 46 «դեմ» ձայների հարաբերակցությամբ ընդունեց այն:
ՀՀ ԱԺ-ն 103 «կողմ», 7 «դեմ», 1 «ձեռնպահ» ձայների հարաբերակցությամբ վավերացրեց նաև Եվրասիական տնտեսական միության մասին» 2014-ի մայիսի 29-ի պայմանագրին միանալու մասին» պայմանագիրը: Պարզվեց, որ ձեռնպահ էր քվեարկել ՀՅԴ խմբակցության քարտուղար Աղվան Վարդանյանը:
Տաթև ՀԱՐՈՒԹՅՈՒՆՅԱՆ
