Այսօր լրագրողների հետ զրույցում վարչապետ Հովիկ Աբրահամյանին հարց ուղղեցին իր՝ արա-ով խոսելու հետ կապված: Վարչապետը պատասխանեց. «Ես մի անգամ եմ արա ասել ու ներողություն եմ խնդրել»:
Վարչապետի խոսքերով՝ «էս տարիքում այդքան մաղձ որտեղի՞ց»:
Վարչապետին հարցեր ուղղեցին իր՝ մշտապես լավ տրամադրության հետ կապված: Նա վստահեցրեց, որ «մեր պետության գործերը, Արցախի գործերը միշտ լավ են լինելու: Ինչի՞ եք ամեն ինչի մեջ վատ բան տեսնում, ես խնդրում եմ լավ բաներ տեսեք: Մի շտապեք, մի քիչ նեղություններ ունենք, այդ նեղությունները կհաղթահարենք: Ես ԱԺ-ում կոչ ունեմ անելու, որ բոլորս համախմբվենք եւ մեր երկրի առջեւ ծառացած ներքին եւ արտաքին մարտահրավերները հաղթահարենք միասին: Եթե լավ առաջարկներ տաք, ես շատ շնորհակալ կլինեմ եւ կփորձեմ դրանք իրացնել՝ իմ լիազորությունների շրջանակներում»:
Լրագրողների դիտարկմանը, որ առաջարկում ենք մենաշնորհները վերացնել՝ Հովիկ Աբրահամյանը պատասխանեց. «Ես դա անելու եմ, ժամանակ է պետք: Հասկանում եմ, որ որոշ մարդկանց մոտ վատ հատկություն կա, դուք էլ գիտեք, որ դրա համար ժամանակ է պետք, ուղղակի միշտ դրա համար ասում եք: Ժամանակ է պետք, չէ՞, որ մենք կարողանանք: Երեխան քանի՞ ամսում է ծնվում՝ 9 ամսում, չէ՞»:
Կարդացեք նաև
Մեր դիտարկմանը, որ երկիրը դատարկվում է մինչ այդ, Հովիկ Աբրահամյանը պատասխանեց. «Բա տենց որ խոսեք՝ կդատարկվի, այնպես գրեք, որ չդատարկվի»:
Մեր հարցին՝ էլի մե՞նք ենք երկրում գաղջ մթնոլորտ ստեղծում՝ նա պատասխանեց. «Չէ, ես նման բան չասեցի»:
Հովիկ Աբրահամյանն ասաց, որ իրավիճակը երկրում փոխելու համար նույնիսկ պատրաստ է իր գործընկերների գործած մեղքերի համար պատասխան տալ:
Հարցին՝ կուզենայի՞ք քարտ բլանշ ունենալ, օրինակ, կուտակայինի հարցում՝ վարչապետը պատասխանեց, որ ունի. «Կուտակայինի հարցում իմ որոշումը շատ ճիշտ էր»:
Հարցին՝ ինչ-որ տեղ կա՞, որ Ձեր ձեռքերը կապված են՝ նա վստահեցրեց, որ ոչ: Նա վստահեցրեց, որ կադրային քաղաքականության հարցում էլ է ինքը շատ ազատ: Ինչ վերաբերում է քննադատությանը, որ իր հետ Տիգրան Սարգսյանի նույն կադրերն են՝ նա պատասխանեց. «Վաչե Գաբրիելյանը իր ունակություններով չի կարող լինել որեւէ մեկի մարդը, նա կայացած մարդ է: Տիգրան Սարգսյանը գնաց, ձեզանից չպրծա՞վ»:
Ընդհանրապես Հովիկ Աբրահամյանը նկատողություն արեց, որ ի՞նչ է նշանակում Տիգրան Սարգսյանի մարդ. «Տիգրան Սարգսյանը կարող է մենակ կին ունենալ»:
Հռիփսիմե ՋԵԲԵՋՅԱՆ
