«Աշխատավարձն ամբողջությամբ փակելու խոստում չի եղել։ Էներգետիկայի նախարարն ասել է՝ փորձելու ենք։ Փորձելը խոստում չէ։ Մենք հնարավորության սահմաններում փորձելու ենք անպայման օգտակար լինել եւ մենք վճարելու ենք նոյեմբեր–դեկտեմբեր ամիսների աշխատավարձերը»,- «Նաիրիտի» խնդրի հետ կապված այսօր լրագրողների հետ զրույցում այսպես մեկնաբանեց վարչապետ Հովիկ Աբրահամյանը:
Նրա խոսքերով՝ «Ես ընդհանրապես դեմ եմ, որ չաշխատող գործարանի տնօրենը ստանա 2 մլն 600 հազար դրամ աշխատավարձ, փոխտնօրենը ստանա 2 մլն 300 հազար դրամ աշխատավարձ, եւ շարունակական այդ պրոցեսը գնա։ Ես դեմ են նման պահվածքին։ Առաջինն այդ տնօրենների խորհուրդը պետք է այդ հարցը վերանայեր։ Չորս տարի է՝ այդ գործարանը չի աշխատում, եւ հիմա մեզ առաջարկում են մարել մի աշխատավարձի պարտք, որը կուտակվել է անհիմն»:
Հովիկ Աբրահամյանն ասաց, թե ինչ են որոշել «Նաիրիտի» հարցով. «Գործարանի աշխատելու հետ կապված մենք խնդրել ենք Համաշխարհային բանկին, որպեսզի իրենք միջազգային փորձագետներ հրավիրեն եւ տան առաջարկ։ Նախարարն ինձ զեկուցել է, որ մինչեւ փետրվար– մարտ ամիս առաջարկը կլինի եւ մենք կորոշենք «Նաիրիտի» ճակատագիրը։ Եթե հնարավորություն կլինի աշխատեցնելու, կառավարությունը կաջակցի այդ պրոցեսին։ Սեփականատեր Ռուսաստանի Մեժգոսբանկը արժեթղթերի 90%–ը իր մոտ է, գրավ է դրված, մոտ 10%–ը կառավարությանն է»:
Հռիփսիմե ՋԵԲԵՋՅԱՆ
