ԱԺ-ում շուտով կլինի ԵՏՄ պայմանագրի քվեարկությունը:
Aravot.am-ի հետ զրույցում ՀՀԿ պատգամավոր Կարինե Աճեմյանը կոչ արեց չընկնել ծայրահեղությունների մեջ եւ ապակողմնորոշել մարդկանց, թե գալու են «Տրոյնոյ օդեկոլոնի» կամ «Կրասնայա Մոսկվայի» ժամանակները: Նրա խոսքերով՝ «Երբ մենք տեսնում ենք աշխարհում ինչ է կատարվում, գլոբալ ինչ վերադասավորումներ են տեղի ունենում, ինչպիսի ճգնաժամեր կան, ՌԴ-ն, եվրոպական երկրները շատ մեծ վտանգների առջեւ են կանգնած, իսկ մենք այնքան փոքրացնում ենք խնդիրը»:
Հիշեցնենք, որ Նիկոլ Փաշինյանը նիստերից մեկի ժամանակ մտահոգություն էր հայտնել, թե հիմա ինչ, կանայք սկսելու են «Տրայնոյ օդեկոլոն» կամ վարունգի դուխի՞ օգտագործել:
Կարինե Աճեմյանի դիտարկմամբ՝ «Բոլորս էլ վտանգների առկայություն ենք զգում, զգում ենք, որ ճգնաժամի հերթական ալիքն է մոտենում: Մենք պիտի կարողանանք այնպես դրսեւորել մեզ եւ այնպես բանակցել, որ առավելագույնը մեր շահերը պաշտպանենք եւ կարողանանք բոլոր տեսակի միավորումներից օգուտ քաղել:
Կարդացեք նաև
Ալեքսանդր Արզումանյանը կոչ էր արել կոճակը սեղմելիս ընտրել սրտի ազատությունը: Մեր հարցին՝ քվեարկության ժամանակ Դուք այդպես էլ անելո՞ւ եք՝ Կարինե Աճեմյանը պատասխանեց. «Առհասարակ, մարդիկ ազատությունը շատ տարբեր ձեւով են ընկալում: Ես ինքս շատ ազատասեր մարդ եմ, կողմ եմ բոլոր տեսակի ազատություններին՝ նաեւ մարդու իրավունքների հետ կապված, բայց երբ դու փոքր երկիր ես եւ մենք տեսնում ենք, որ որեւէ հարց լուծելու համար երկրները միավորվում են, այս դեպքում ընդհանրապես տեղին չի կապել մեկը մյուսի հետ: Ես չեմ կարծում, որ մենք ԵՏՄ-ին միանալու դեպքում վտանգում ենք մեզ: Եթե մենք փակենք մեր աչքերը ամեն լավ բանի առաջ, մոռանանք դրականը եւ միայն բացասականի վրա կենտրոնանանք, ամեն դեպքում կգտնենք այդ կետերը: Բայց մենք պիտի կարողանանք օգուտներ քաղել ԵՏՄ-ին ինտեգրվելուց: Այս քաղաքական, աշխարհաքաղաքական իրադարձությունների մեջ մեր միավորումը ԵՏՄ-ին ես համարում եմ դրական»:
ՀՀԿ խմբակցության պատգամավոր Հայկ Բաբուխանյանը երեկ նիստի ժամանակ ասում էր, թե մենք չենք ուզում այլասերված կոնչիտաներին, Եվրոպան անպայման Կոնչիտանե՞րն են, եթե այդպես է, ինչի՞ էիք 4 տարի բանակցում Եվրոասոցացման պայմանագրի շուրջ ՝ Կարինե Աճեմյանը պատասխանեց. «Դա էլ է ծայրահեղություն, ես միշտ դեմ եմ բոլոր տեսակի ծայրահեղություններին, որովհետեւ Եվրոպան միայն Կոնչիտան չի: Եվրոպան այն համամարդկային արժեքներն են, այն ազատություններն են, որոնք մենք պատկերացնում ենք: Այն գիծը, որը մենք Եվրոպայի հետ տարել ենք, մեր օրենսդրական դաշտը մոտեցրել ենք եվրոպականին, մենք իրավունք չունենք եվրոպական արժեքների մասին վատ խոսել կամ Եվրոպայի հետ մերձեցման դիմաց ինչ-որ արգելքներ դնել: Դա սազական չի որեւէ քաղաքակիրթ երկրի»:
Հռիփսիմե ՋԵԲԵՋՅԱՆ
