ԱԺ-ն ընդմիջումից հետո շարունակում է քննարկումները` ՀՀ-ի` ԵՏՄ-ին անդամակցության պայմանագրի վավերացման թեմայով:
ՀԱԿ խմբակցության ղեկավար Լևոն Զուրաբյանը, շարունակելով ընդհատված ելույթը, հայտարարեց. «Անկախության կորստի մասին խոսակցությունները հուզականության ոլորտից են, ինքնիշխանության կորուստը կախված կլինի ՀՀ իշխանությունների` չընտրված և լեգիտիմ չլինելուց: Ուստի ՀՀ իշխանությունները չլինելով ընտրված` ԵՏՄ-ում ներկայանում են ոչ թե պահանջողի և հարցեր բարձրացնողի, այլ ենթարկվողի և հրամաններ կատարողի դերում»: Նա զգուշացրեց, թե ԵՏՄ-ում մեզ ծանր պայքար է սպասվում:
ՀՀԿ խմբակցության ղեկավար Վահրամ Բաղդասարյանը իր ելույթում շարունակեց այն թեզը, թե անվտանգության տեսանկյունից մենք այլընտրանք չունեինք: Այնուհետև զարմանքն արտահայտեց. «Զարմանում եմ մեր ընդդիմադիր գործընկերների հուզմունքի վրա, երբ նույն ամերիկացիներն ու եվրոպացիները հանգիստ են վերաբերվում: Իհարկե, հասկանում եմ մեր որոշ ընդդիմադիր գործընկերների հուզմունքը, բայց չեմ հասկանում, թե ինչու Ռուբիկ Հակոբյանը պիտի դեմ քվեարկի»:
Այնուհետև ՀՀԿ խմբակցության ղեկավարը հայտարարեց, թե որևէ մեկը չի կարող հայտարարել, որ այս խնդիրը մեկ գիշերում է կարգավորվել ու շեշտեց, որ անկախության օրվանից սկսած մեր թիվ մեկ ռազմավարական գործընկերը եղել է Ռուսաստանը:
Կարդացեք նաև
Վահրամ Բաղդասարյանը կոչ արեց չանհանգստանալ պետականության կորստի մասին, քանի որ այսպիսով «այն ավելի ենք ամրապնդում»:
Ելույթի ավարտին հորդորեց. «Ձեռքներս հեռու պահենք անկախ Արցախից, այն պետք է մնա առանձին անկախ պետություն»:
Տաթև ՀԱՐՈՒԹՅՈՒՆՅԱՆ
