Բուլղարիայի վարչապետ Բոյկո Բորիսովը խորհրդարանից պահանջել է կառավարությանը ներկայացնել «Հարավային հոսք» գազատարի պայմանագիրը, որպեսզի ծանոթանան դրա հիմնական դրույթներին ու թե իր երկիրն այդ ծրագրից որքան է շահում, գրում է «Ռոսբալտ»-ը:
«Թե ինչ օգուտներ է Բուլղարիան քաղելու «Հարավային հոսք»-ից, դրա վերաբերյալ մեզնից ոչ ոք դեռ որևէ թիվ չի կարդացել: Ուզում եմ խնդրել խորհրդարանին՝ օգնել գտնել պայմանագրային փաստաթղթերը, իսկ եթե հարկ լինի, գտնել այն ուժային մեթոդներով», – խորհրդարանում ելույթի ժամանակ հայտնել է Բորիսովը:
Ռուսաստանի նախագահ Վլադիմիր Պուտինը դեկտեմբերի 1-ին Անկարայում Թուրքիայի նախագահ Ռեջեփ Թայիփ Էրդողանի հետ ունեցած մամուլի ասուլիսի ժամանակ հայտնել էր, որ «այժմյան պայմաններում Ռուսաստանը չի իրականացնի «Հարավային հոսք» նախագիծը, դրա փոխարեն կսկսի ծովային գազատար կառուցել դեպի Թուրքիա»: Պուտինի խոսքերով, նման որոշում իրենք կայացրել են նաև Եվրամիության ոչ կառուցողական դիրքորոշումից ելնելով:
Պատրաստեց Հովհաննես ԻՇԽԱՆՅԱՆԸ
