Այսօր, կառավարության նիստից հետո` մամուլի ասուլիսին առողջապահության նախարար Արմեն Մուրադյանն անդրադառնալով Եղվարդի մանկապարտեզի երեխաների թունավորման դեպքին, ասաց, որ երեխաների մոտ դիզենտերիա է ախտորոշվել. սա կեղտոտ ձեռքերի միջոցով փոխանցվող հիվանդություն է:
Նախարարի փոխանցմամբ` մանկապարտեզում զանգվածային թունավորման դեպքով զբաղվում է Քննչական կոմիտեն եւ թունավորման պատճառները պարզ կլինեն ուսումնասիրություններից հետո:
Տարածված լուրերի համաձայն`երեխաները «Մուշ» ընկերության նրբերշիկն են կերել, նախարարն ասաց, որ առողջապահության նախարարության կողմից սահմանված է, որ մանկապարտեզների երեխաների ճաշացանկում նրբերշիկ չպիտի լինի: Իսկ մանկապարտեզներում ճաշացանկի վերահսկումն իրականացնում է սննդի անվտանգության պետական ծառայությունը:
Հարցին` արդյոք հնարավո՞ր է մեկ անձից այդքան շատ մարդիկ վարակվեին, եւ շրջանառվում են լուրեր, որ փորձում են ծածկադմփոց անել` ի շահ մսամթերք արտադրող ընկերության, նախարարն ասաց. «Դիզենտերիան կեղտոտ ձեռքերի միջոցով փոխանցվող հիվանդություն է եւ դա կարող է պատահել կենցաղային պայմաններում: Ինչ վերաբերում է ծածկադմփոցին`կարծում եմ դա բացառվում է, եւ այդ հարցով պետք է դիմել համապատասխան մարմիններին, բայց հարուցված քրեական գործն արդեն խոսում է այն մասին, որ հարցի պատասխանները լինելու են լիարժեք»:
Կարդացեք նաև
Թունավորված երեխաների մոտ, ըստ նախարարի, դրական տեղաշարժ է արձանագրվել, մեծ մասը բավարար վիճակում դուրս է գրվել հիվանդանոցից. հիմա 2 երեխա Նորքի ինֆեկցիոն հիվանդանոցում են, 4 երեխա եւ 1 մեծահասակ Եղվարդի հիվանդանոցում են:
Նելլի ԲԱԲԱՅԱՆ
