«Մենք իմպիչմենտի հարցը դրել ենք Մաքսային միություն մտնելուց առաջ, որ մարդիկ ոտքի կանգնեին եւ թույլ չտային այդ անդամակցությունը»,- այսօր` դեկտեմբերի 4-ին, «Բլից ինֆո» մամլո ակումբում լրագրողների հետ հանդիպման ընթացքում, անդրադառնալով ԱԺ պատգամավոր Նիկոլ Փաշինյանի իմպիչմենտի նախաձեռնությանը, հայտարարեց «Սասուն» ջոկատի հրամանատար, ԱԺ նախկին պատգամավոր Սասուն Միքայելյանը:
Խոսելով ոչ իշխանական խորհրդարանական եռյակի մասին` նա նշեց, որ ՀԱԿ-ը եւ ԲՀԿ-ն ցանկանում են Ռուսաստանի թագաժառանգը դառնալ, իսկ Րաֆֆի Հովհաննիսյանին ամբիոն էր պետք` ընտրություններից հետո վերակենդանանալու համար. «Տարբերություն չկա, եթե եռյակը, ավելի ճիշտ` երկյակը, տանի իշխանափոխության, մենք կգնանք ոչ թե իշխանափոխության, այլ իշխանափոխանցման: Փոխանցում ենք մի կայսրության ուրիշ հավատացյալի»:
Պարոն Միքայելյանը համարում է, որ Հայաստանը զարգացում կունենա այն դեպքում, երբ երեք նախագահները հեռանան. «Լեւոն Տեր-Պետրոսյանը, պատերազմ հաղթեցինք, ինչ-որ մի տեղ նախագահ էր, բայց այս երկուսի կառավարման ընթացքում ի՞նչ առաջընթաց էր ապրել Հայաստանը»:
Նա հավելեց, որ երբեք չի համարել, որ Ռոբերտ Քոչարյանը եւ Սերժ Սարգսյանը տարբեր մարդիկ են. «Մի’ մոռացեք, որ Ռոբերտ Քոչարյանը 10 տարի Հայաստանի Հանրապետության նախագահն է եղել եւ արդեն ձեւավորել է իր թիմը: Իսկ եթե Գագիկ Ծառուկյանը գնա իշխանափոխության, ես իր հետ գնալու եմ»:
Կարդացեք նաև
Մանրամասները` տեսանյութում:
Ամի ՉԻՉԱԿՅԱՆ
