«Դասեր տալու ժամանակը չէ, մանավանդ նրանց համար, ովքեր դասերը դեռ չեն սովորել, դասեր սովորելու ժամանակն է»,-այսօր ՀՀ ԱԺ-ում հայտարարեց ՀՅԴ խմբակցության ղեկավար Արմեն Ռուստամյանը:
Հիշեցնենք, որ «Ժառանգություն» խմբակցության պատգամավոր Զարուհի Փոստանջյանը մտահոգություն էր հայտնել, որ ԵՏՄ-ին անդամակցելու գործընթացներին միացել է նաև ՀՅԴ-ն:
Պարոն Ռուստամյանը մի շարք իրողություններ օրինակ բերեց, որոնց պատճառով ենք գնում այդ քայլին: Առաջինը`ՀՀ-ն Արցախի հետ պարտավոր է հիշել, որ եթե ուզում ենք խաղաղություն, պիտի պատրաստ լինենք պատերազմի:
Արմեն Ռուստամյանը հիշեցրեց, որ այս գործընթացների մեջ ենք դեռ 1994-ից ու ասաց. «Այս իրավապայմանագրային մակարդակով հարցը լուծվել է 1994-ին: Այս բացահայտումը նոր, չդադարող ջղաձգումների ալիք է բարձրացրել: Հանգստացեք հարգելիներս, սա փաստ է, իրողություն: Մենք այն ժամանակ էլ ընդդիմություն էինք, երբեք ընդվզում չենք արել: Սա մեզ և դաշնակցականների համար անվտանգության հարց է: Ոչ թե պրիմիտիվ անվտանգության, անվտանգությունը միայն փամփուշտի քանակը չէ, հազար ու մի գործոններ կան»:
Կարդացեք նաև
ԲՀԿ խմբակցության պատգամավոր Գուրգեն Արսենյանը գերադասեց խոսել իր ղեկավարած Միավորված աշխատանքային կուսակցության անունից և հայտարարեց, թե կողմ է պայմանագրին:
Ելույթը սկսեց միֆերից ու առասպելներից, հասավ մինչև «Նաիրիտի» շահագործում ու շեշտեց, թե միֆերով ու առասպելներով ցանկանում են շփոթեցնել մարդկանց: Նա հավաստիացրեց, որ պայմանագրին միանալով հսկայական ու երկարաժամկետ ռեսուրս ենք տալիս մեր ժողովրդին:
Տաթև ՀԱՐՈՒԹՅՈՒՆՅԱՆ
