«Եվրասիական տնտեսական միություն անդամակցությամբ հիմք է դրվում, որ մեր Հայաստանի Հանրապետությունը կորցնի իր անկախությունը եւ ինքնիշխանությունը»,- այսօր` դեկտեմբերի 4-ին, «Բլից ինֆո» մամլո ակումբում լրագրողների հետ հանդիպման ընթացքում հայտարարեց «Սասուն» ջոկատի հրամանատար, ԱԺ նախկին պատգամավոր Սասուն Միքայելյանը:
Նա համոզված է, որ ԵՏՄ-ն ոչ մի լավ բան չի կարող տալ Հայաստանին, մանավանդ, այն դեպքում, երբ նրա անդամ երկրների հետ Հայաստանը ոչ մի սահման չունի. «Մեր միակ ճանապարհը եղել է Իրանը եւ Վրաստանը, եւ այսօր շուտով դրանից էլ կզրկվենք կամ էլ խնդիրներ կունենանք: Արդեն իսկ խնդիրներ ունենք, որովհետեւ երբ Պուտինը գնաց Թուրքիա, այնտեղ խոստացավ, որ ներդրում կանի՝ ատոմակայան կկառուցեն»:
Պարոն Միքայելյանը համարում է, որ ոչ իշխանական ուժերին չի հետաքրքրում, թե Հայաստանը ուր է գնում. «Իրենց հետաքրքրում է, թե ռուսական թագը ո՞ւմ գլխին կդնեն, կմնա՞ Սերժ Սարգսյանի գլխին, թե՞ նրանցից որեւէ մեկը կվերցնի: Այսօր ես մեծ վտանգ եմ տեսնում, որ մենք բռնել ենք այս ճանապարհը, քանի որ մենք ընդհանրապես մեկուսանալու ենք աշխարհից, Ռուսաստանի հետ էլ, բնականաբար, ճանապարհ չունենք»:
Անդրադառնալով անվտանգության խնդրին` նա նշեց, որ եթե Ռուսաստանը Ադրբեջանին զենք է վաճառում, ի՞նչ անվտանգության մասին է խոսքը. «Այս տարիների ընթացքում մենք պետք է կարողանայինք համախմբվել, երկիրը տնտեսական առումով զարգացնել: Բանակը հզոր է հենց տնտեսությամբ եւ հավատով, որը մենք այսօր չունենք»:
Կարդացեք նաև
Ամի ՉԻՉԱԿՅԱՆ
