«Այս ամբիոնից հնչեց մի վտանգավոր հայտարարություն, թե Արցախը Հայաստան չէ: Վտանգավոր հայտարարություն էր. այդպիսով սեպ եք խրում մեր մեջ»,-այսօր ՀՀ ԱԺ ամբիոնից հայտարարեց ՀՀ «Ժառանգություն» խմբակցության պատգամավոր Զարուհի Փոստանջյանը` նկատի ունենալով ՀՀ ԱԺ փոխնախագահ Էդուարդ Շարմազանովի հայտարարությունը: Այնուհետև շարունակեց. «Մենք ԵՏՄ պայմանագրին միանալով` անտեսել եք Արցախի հանրապետությունը: Դուք դեռ ստորագրեք փաստաթուղթը ու տեսեք` ինչ պարտադրանքների ներքո ենք հայտնվելու»:
Իր ելույթում Զարուհի Փոստանջյանը ռուսերենով ներկայացրեց ռուս մտավորականներից մեկի մտահոգությունները ռուսական իրականության մասին, որտեղ, մասնավորապես նա ասում էր, որ իրենք և բոլորը անպաշտպան են ռուսական իշխանությունների առաջ և երկիրը գտնվում է խավարի մեջ:
Դահլիճից ՀՀԿ-ական պատգամավորները միջամտեցին, թե ինչու է Զարուհի Փոստանջյանը ռուսերեն ելույթ ունենում: «Ժառանգություն» խմբակցության պատգամավոր Ալեքսանդր Արզումանյանը արձագանքեց. «ԵՏՄ-ի լեզվով է խոսում»: Գալուստ Սահակյանը հորդորեց հանգստանալ, Զարուհի Փոստանջյանին էլ զգուշացրեց, թե լեզվի մասին օրենք է խախտում, ուստի եթե ռուսերեն ելույթ էր ունենալու, գուցե մեկ օր առաջ զգուշացներ, որ թարգմանիչ հրավիրեին:
Զարուհի Փոստանջյանն էլ հակադարձեց. «Դուք ռուսերեն չե՞ք հասկանում» ու շարունակեց. «Շուտով այս ամբիոնից դուք էլ եք շարունակելու խոսել ռուսերեն` լրացնելով մաքսային միության փաստաթղթերը ռուսերեն»:
Կարդացեք նաև
Պատգամավորը մտահոգություն հայտնեց, թե մեզ բռնակցել են այդ միությանը ու նկատեց, որ այս խորհրդարանը չի գիտակցում, թե սա ուր է մեզ տանելու ու նշեց, թե սրա պատճառն այն է, որ չունենք ազգային օրակարգ:
Այնուհետև դիմելով ՀՅԴ-ին ասաց. «Ցավում եմ, որ իմ շատ սիրելի դաշնակցականները նույնիսկ չեն կարողանում ձևակերպել մեր ազգային ծրագիրը: Մենք այսօր մեր քսան տարիների ձեռք բերած երկաթյա շերեփը փոխարինում ենք թղթե շերեփով: Ցավս այն է, որ այս ամենին միացել է նաև Դաշնակցությունը»:
Տաթև ՀԱՐՈՒԹՅՈՒՆՅԱՆ
