Կառավարության այսօրվա նիստի սկզբում վարչապետ Հովիկ Աբրահամյանի հանձնարարականով Կենտրոնական բանկի փոխնախագահ Ներսես Երիցյանն անդրադարձավ փոխարժեքի շուկայում տեղի ունեցող զարգացումներին: Նա նշեց, որ վերջին շրջանում տարածաշրջանի և միջազգային շուկայում տեղի ունեցած զարգացումները, այդ թվում՝ արժութային շուկայի մեծ տատանումները նպաստել են ներքին արժութային շուկայում դրամի արժեզրկմանը և ձևավորված որոշակի սպասումների ներքո հանգեցրել են նաև փոխարժեքի տատանողականության աճին:
«Ցավոք սրտի, ձևավորված սպասումները այդուհանդերձ որոշակի մտավախությունների տեղիք են տվել, որովհետև նաև ճշգրտում է ապրել փոխարժեքը: Մեր վերջին հայտարարություններն ուղղված էին սպեկուլյացիաներից և անհարկի փոխարկումներից զերծ պահելուն, քանի որ փոխարժեքի նման տատանողականության վարքագծի պայմաններում դրանք իրենց մեջ կրում են բարձր ռիսկեր և չմասնագիտացված անձանց մոտ ակնկալվող օգուտի փոխարեն կարող են հանգեցնել նաև զգալի վնասների»,- ասաց նա:
Ներսես Երիցյանը հավատացրեց, որ ԿԲ-ն ամենայն պատասխանատվությամբ է վերաբերվում իր գործառույթներին, որպեսզի կայունացնի իրավիճակը: Գործի են դրել իրենց տրամադրության տակ եղած բոլոր գործիքները, որպեսզի կարողանան տատանողականությունը հաղթահարել: «Բայց այն, ինչը դրսի շոկով է պայմանավորված, այդ ճշգրտումները բնականաբար պետք է իրենց տեղը գտնեն: Կենտրոնական բանկի պահուստները լիովին բավարար են՝ կանխելու փոխարժեքի բոլոր տեսակի արհեստական տատանումները և ապահովելու ֆինանսական կայունությունը: Մեր պահուստները համարժեք են շրջանառության մեջ գտնվող կանխիկ դրամին: Այդ իմաստով որևիցե խնդիր չենք տեսնում»,- ասաց նա:
Բացի այդ, Երիցյանի խոսքով, քանի որ բանկային համակարգի հետ կապված տարբեր մտահոգություններ կան, ԿԲ-ն ուզում է հավատացնել, որ բանկային համակարգի կայունությունը նույնպես ապահովված է, երաշխավորված է կապիտալի բարձր մակարդակով: Բանկերի մեծ ակտիվներն ու պարտավորություններն արդեն իսկ դոլարով են, բանկերն ունեն շատ մեծ դոլարային իրացվելիություն՝ և կանխիկ, և անկանխիկ, ինչը նույնպես համարժեք է շրջանառության մեջ գտնվող կանխիկին: «Այդ իմաստով բանկերը պետք է ի վիճակի լինեն սպասարկելու մեր քաղաքացիների պահանջները»,- ասաց նա:
Կարդացեք նաև
Ներսես Երիցյանը նշեց, որ ուզում է նաև շեշտել, որ ԿԲ գնահատմամբ և կանխատեսումներով՝ գների կայունության հետ կապված նույնպես զգալի ռիսկեր այս պահին չկան: Գնաճի ցուցանիշը 2014-15 թվականներին կգտնվի նպատակային ցուցանիշի շուրջ՝ տատանումների թույլատրելի միջակայքում՝ 4 պլյուս-մինուս 1.5 տոկոս: «Այս տարի կլինի 4 տոկոսի սահմաններում, եկող տարի՝ 4 պլյուս-մինուս 1.5 տոկոսի սահմաններում՝ հաշվի առած բոլոր վերջին զարգացումները արտարժութային շուկայում»,- ասաց նա:
Վարչապետ Հովիկ Աբրահամյանը Տնտեսական մրցակցության պաշտպանության պետական հանձնաժողովի նախագահ Արտակ Շաբոյանին հանձնարարեց կառավարության հաջորդ նիստին ներկայացնել ապրանքների գնաճի վերաբերյալ տեղեկատվությունը: «Ներկայացրել են մեկ անգամ, ես ծանոթ եմ՝ մոտ 5 տոկոսի շրջանակներում կար գնաճ, բայց նաև հասարակության մեջ կա այնպիսի կարծիք, խոսակցություններ, որ դա 10 տոկոս, 15 տոկոս է: Որպեսզի նաև փարատենք այդ կասկածները, խոսակցությունները, ես խնդրում եմ կառավարության հաջորդ նիստին ներկայացնեք այս 10 օրվա ապրանքների գնաճը»:
Նելլի ԲԱԲԱՅԱՆ
