Հետաքրքիր է, որ «թեժ աշնան» մասին խոսակցությունները մի տեսակ կտրուկ դադարեցին:
Պատճառը գուցե նաեւ երեկվա ձյո՞ւնն էր: Նաեւ դա, իհարկե, բայց հիմնականն այնուամենայնիվ այն է, որ աշունը պարզապես ավարտվեց: Արդեն թե՛ օրացուցային, թե՛ եղանակային առումով ձմեռ է: Ամենաիսկական: Ինչը չես ասի ԲՀԿ-ՀԱԿ-«Ժառանգություն» եռյակի մասին: Հարկավ նրանք իսկապես էլ երեք ուժ են, եւ «իսկական» լինելու վերաբերյալ կասկածը վերաբերում նույն այդ եռյակի փքուն հայտարարություններին:
Ի՞նչ էին նրանք հայտարարում դեռ աշնան սկզբին: Ճի՛շտ է, հայտարարում էին, որ իշխանություններին «թեժ աշուն» են բերելու, այսինքն` մի այնպիսի վիճակ են ստեղծելու, որ իշխանություններին չի մնա այլ բան, քան թողնել-փախչելը կամ մեծահոգի եռյակ ուժերի առաջ մեղա գալով` կառավարության ու մնացյալ պետական հաստատությունների բանալիները կապույտ եզրաշերտով սկուտեղի վրա Ծառուկյան-Տեր-Պետրոսյան-Հովհաննիսյան եռյակին հանձնելը: Եվ ի՞նչ:
Իսկ ոչինչ, երկու միջակ հանրահավաք արեցին, որոնց հիմնական «ինտրիգն» այն էր, որ ԲՀԿ նախագահ Գագիկ Ծառուկյանն արտասանի «իշխանափոխություն» բառը:
Կարդացեք նաև
Հետաքրքրականն այն է, որ սեպտեմբերին, դեռ մարզային, այսպես՝ «թեժ աշնան» նախապատրաստական հանրահավաքների ժամանակ եռյակի ներկայացուցիչները շատ բարձր նոտա վերցրին: Ինչեր ասես, որ չհայտարարեցին՝ է՛լ անշրջելի գործընթաց պիտի սկսեն, է՛լ գործերի հանրահավաք պիտի անեն, երրորդը, չորրորդը:
Բայց ո՛չ եռյակի սկսած գործընթացն է մի առանձնապես երեւում, ոչ էլ ինչ-որ գործ: Գործ, որպես այդպիսին, չկա, փոխարենը կան բազմաթիվ հայտարարություններ, թե իրենք, այսինքն՝ եռյակի ուժերը, ակտիվ աշխատում են:
Եռյակի այդ «ակտիվությունը» նոր խոսք է քաղաքական տեխնոլոգիաների ասպարեզում: Եվ այն կարելի է բնորոշել որպես «թաքնված ակտիվություն»: Եվ այդ, այսպես ասած, «թաքուն ակտիվությունը» փորձ է արվում հրամցնել որպես «համաժողովրդական շարժման շտաբների (այսուհետ՝ ՀՇՇ, չշփոթել ՀՀՇ-ի հետ) բացում՝ մարզերում:
Ա. ՀԱԿՈԲՅԱՆ
Հոդվածն ամբողջությամբ՝ «Հայոց աշխարհ» թերթի այսօրվա համարում
