Քո աչքերին նայելիս,
Հոգուս սարսուռ է պատում,
Քո աչքերը՝ նայելիս,
Սիրտս թրթիռ է ծորում:
Կարդացեք նաև
Քո աչքերը հուզվելիս,
Ծով արցունք են արձակում,
Քո աչքերը՝ հուզելիս,
Իմ անցյալն են ետ բերում:
Քո աչքերը ժպտալիս,
Ողջ աշխարհն են երերում,
Քո աչքերը պարելիս,
Բյուր մանկանց են օրորում:
Քո աչքերի երկունքից,
Ողջ աշխարհն է մայրանում,
Քո աչքերի խաղերից,
Քար սրտերն են բաբախում:
Քո աչքերի ցոլքերից,
Ցամքած արտերն են ջրվում,
Քո աչքերի կրակից,
Հոգիներ են հրդեհվում:
Քո աչքերի օրորից,
Մանուկներն են քուն մտնում,
Քո աչքերի քնքշանքից,
Հազար սրտեր են հալվում:
Քո աչքերի հմայքից,
Քնած աչքերն են զարթնում,
Քո աչքերի շողերից,
Աղջիկներն են հարսնանում:
Քո աչքերի հայացքից,
Դավաճանն է փոշմանում,
Քո աչքերի սարսուռից,
Թշնամին է հեշտ ծնկում:
Քո աչքերը մարելիս,
Շուրջը մթով է պատվում,
Դրանք՝ հավերժ փակելիս,
Կյանքը սգով է լցվում…
Անանիա ՄԱՂԱՔՅԱՆ
