«Սեւանի սիգ, Սեւանի իսկական սիգ». այսպես են գովազդում
իրենց ապրանքը Երեւանի փողոցներում ու բակերում սիգ վաճառողները:
Մաշտոցի փողոցում այսպիսի մի առեւտրական մեզ վստահեցրեց՝
«Մարտունեցիներից եմ առել, իսկական սիգ ա»: Իսկ երբ ասացինք՝
Սեւանում սիգի որսն արգելված է, առեւտրականը խոսքը փոխեց. «Հա լավ,
Ջերմուկի լճերի սիգն ա, բայց ոչ մի բանով Սեւանից չի տարբերվում»:
Սեւանի՞, թե՞ Ջերմուկի սիգ. սպառողը չի կարող տարբերել, թե որտեղի սիգն է. մասնագետներն ասում են՝ անգամ իրենք են դժվարությամբ պարզում սիգի «ծագումը»:
ԳԱԱ հիդրոէկոլոգիայի եւ ձկնաբանության ինստիտուտի տնօրեն Էվելինա Ղուկասյանը վստահեցնում է. «Սեւանի սիգ է, ու չնայած սիգի որսն արգելված է, միեւնույն է՝ մեծ քանակությամբ որսում են, ու բակերում հանդիպող սիգը, հավաստիացնում եմ, հենց Սեւանինն է»:
Լուսանկարը՝ ՆԵԼԼԻ ԲԱԲԱՅԱՆԻ
«Առավոտ» օրաթերթ
3.12.2014
