Ինչպե՞ս էր, որ քառյակն արտահերթ նիստ էր հրավիրում՝ ուժեղանում էր,
իսկ Նիկոլ Փաշինյանը իմպիչմենտ է ուզում՝ թուլանում է
Դուք համաձա՞յն եք, որ Սերժ Սարգսյանն այսօր վայելում է խորհրդարանի լիակատար վստահությունը, եւ Արտաշես Գեղամյանի հայտարարությունն ինչքանո՞վ է համապատասխանում իրականությանը: «Առավոտի» հետ զրույցում մեր այս հարցին ՀՅԴ խմբակցության ղեկավար Արմեն Ռուստամյանը պատասխանեց. «Նիկոլ Փաշինյանի նախաձեռնությունը նման հնարավորություն տալիս է, որ այդպիսի հայտարարություններ հնչեն: Եթե դա նախաձեռնություն է, որին միանում է 3 պատգամավոր, բնականաբար, դա այն վիճակն է, որը ձեռնտու է մեծամասնությանը»:
Հիշեցնենք, որ Նիկոլ Փաշինյանի իմպիչմենտի ձեւաթղթի տակ ստորագրել էին ընդամենը 3 պատգամավոր, եւ ՀՀԿ խմբակցության պատգամավոր Արտաշես Գեղամյանը ԱԺ նիստում հայտարարեց, որ եթե 131 պատգամավորներից 3-ն են ստորագրել, նշանակում է՝ Սերժ Սարգսյանի քաղաքականությունն օգտվում է ԱԺ-ի լիարժեք վստահությունից:
Արմեն Ռուստամյանի խոսքերով՝ «Եթե այնպիսի բովանդակությամբ է ներկայացվում նախագիծը, որը հեշտ մերժելի է, իսկապես հիմքեր ունենալով՝ կարող են մերժել, որովհետեւ սահմանադրական պահանջներին լիարժեք չի բավարարում: Մեղադրանքներ են ներկայացվում, որոնց հետ կապված Սահմանադրությունն ասում է, որ նախագահը չի կարող դրանց համար իր պաշտոնավարման ժամանակ, նաեւ պաշտոնավարումից հետո էլ հետապնդվել: Այսինքն՝ շատ լուրջ թերություններ կան: Եվ սա առիթ է տալիս հայտարարություններ անելու, որովհետեւ եթե մի բան մինչեւ վերջ չես կարողանում տանել, դու ես դառնում խոցելի, եւ քեզ օգտագործում են»:
Մեր դիտարկմանը, որ երբ Դուք եռյակի անդամ էիք եւ արտահերթ նիստեր էիք հրավիրում, այն ժամանակ էլ կար այդ խնդիրը, որ չէիք կարողանալու մինչեւ վերջ անցկացնել նախագիծը, որովհետեւ ձայներն ի վերջո չէին բավարարելու, ինչո՞ւ էիք այդ ժամանակ այդպես անում՝ Արմեն Ռուստամյանը պատասխանեց. «Մենք ներկայացնում էինք՝ նկատի ունենալով, որ եթե մերժեն, իրենք են դառնում խոցելի: Մենք դա անում էինք՝ հասկանալով, որ կարող է մերժվեն մեր առաջարկները, բայց դրանից մենք ոչ թե կորցնում էինք, մեր դիրքերը թուլացնում, այլ ընդհակառակը՝ ուժեղացնում էինք: Եվ այդպես եղավ, որ քառյակը գնալով ավելի ու ավելի հզորացավ: Դա տեղի ունեցավ բոլորի աչքի առաջ, դարձավ գործոն հենց այդ պատճառով, որ ամեն մերժումից հետո ավելի ամրապնդվեց, եւ ավելի դաշտը բաժանվեց սպիտակի ու սեւի: Դրանից սարսափած էր, որ իշխանությունները գնացին այդ քայլերին: Մենք գիտեինք, որ մեծամասնություն չենք, բայց այնպիսի հարցեր էինք արծարծում, որ իշխանությունների մերժումն ուժեղացնում էր մեր դիրքերը: Հասցեատերը մեծամասնությունը չէր միայն, հասցեատերը հասարակությունն էր: Հասարակությանը մոբիլիզացնելու խնդիր էր մի ժամանակ լուծում քառյակը»:
Կարդացեք նաև
Մեր հարցին՝ ընդդիմության մեջ յուրայինների հարց չկա՞, որ մերոնք-ձերոնք անեք եւ ուրիշների նախագծերին չաջակցեք՝ Արմեն Ռուստամյանը պատասխանեց. «Մենք չունենք այդպիսի հարց: Ովքեր այդպիսի հարց դնում են, դրանք ուղղակի ձախողում են երկրի հնարավոր զարգացումն ու առաջընթացը, նորից ուզում են նույն սխալը կրկնել, որը ոչինչ չի տալու: Եթե անգամ ինչ-որ բան էլ տեղի ունենա փոփոխությունների առումով, այդ փոփոխությունը ծառայելու է միայն այն խմբին, որն այդ պահին օգտվելու է դրանից: Ժողովուրդը դրանից ոչինչ չի շահելու: Դրա համար ենք ասում՝ թող գան ամբողջական իշխանափոխության մեր գաղափարին, որպեսզի երկրում իրական բան փոխվի»:
«Ժառանգության» պատգամավոր Թեւան Պողոսյանն էլ վստահեցրեց, որ համաձայն չէ Արտաշես Գեղամյանի հետ. «Միգուցե Սերժ Սարգսյանը ՀՀԿ ֆրակցիայի վստահությունը վայելում է, բայց առնվազն ոչ «Ժառանգության», ոչ ՀԱԿ-ի վստահությունը, գիտեմ, որ չի վայելում: Վստահությունը տարբեր գնահատականների մեջ է: Գործողությունը չափում ես հնարավորության հետ: Վստահ եմ, որ մեկ անգամ չեք լսել տարբեր քաղաքական գործիչներից, որ սրանից հետո իրենք չեն նախաձեռնի գործողություններ, որոնք հնարավոր չէ տեղ հասցնել, եւ իրենք չեն պատրաստվում նորից հիասթափեցնել ժողովրդին: Ուրախ եմ, որ հիմա սկսել են հաշվարկել եւ չնախաձեռնել երեւույթներ, որոնք չեն կարողանալու տեղ հասցնել: Բայց դա չի նշանակում, որ Սերժ Սարգսյանի նկատմամբ վստահությունը 100 տոկոսանոց է, եւ նա վայելում է վստահություն: Մեկնաբանություն է, որը արդեն կանխատեսվում էր տարբեր հայտարարությունների մեջ: Փաստորեն կարողանում են ճիշտ կանխատեսել: Թող Արտաշես Գեղամյանը վստահի Սերժ Սարգսյանին, իսկ չվստահողներն իրենց ճանապարհը կանցնեն»:
Մեր հարցին՝ անձամբ Ձեր չստորագրելու պատճառաբանությունն է՞լ էր դա, որ եթե հաջողության չէր հասնելու, ինչ իմաստ ուներ ստորագրել, Թեւան Պողոսյանը պատասխանեց. «Բնականաբար, այդ խնդիրը կար, խնդիր կար, որ պետք էր քննարկել տարբեր տեսակետներ: Ինչքան հիշում եմ, պարոն Փաշինյանն է եղել այն մարդը, որը առաջինը հայտարարեց՝ չեն անի գործողություններ, որոնք հնարավոր չէ տեղ հասցնել: Ես շատ գնահատում եմ իր այդ ունակությունը եւ հասկանում եմ, որ ինքն էլ է փայլուն իմանում, թե որտեղ է սա կանգնելու: Ոնց որ թե ուրիշ նպատակ էր սա հետապնդում»:
Մեր դիտարկմանը, որ Նիկոլ Փաշինյանը 3 պատճառ նշեց այդ նախագծի համար, այդ թվում՝ իր ընտրողների առջեւ հավատարմության հաստատումը՝ Թեւան Պողոսյանը պատասխանեց. «Շատ լավ: Մնացած կուսակցություններն էլ, հավատարիմ մնալով իրենց ընտրողների առջեւ, իրենց ծրագիրն են տանում առաջ: Սա չի նշանակում, որ ճանապարհ չկա, որ դեռ միասին պիտի անցնենք»:
ԲՀԿ պատգամավոր Տիգրան Ուրիխանյանը Սերժ Սարգսյանի՝ ԱԺ-ում լիակատար վստահություն վայելելու հետ կապված ասաց, որ ինքը խորհրդարանի կողմից լիազորված չէ, ինչ վերաբերում է անձամբ իր դիրքորոշմանը՝ «Ես ներկայացնում եմ այն քաղաքական ուժը եւ իմ բոլոր ջանքերն ու ամբողջ եռանդը գործադրել եմ, որպեսզի իմ քաղաքական ուժը իրականացնի իր առջեւ դրված նպատակը, այն է՝ Հայաստանում արմատական փոփոխությունների իրականացում՝ իշխանափոխությամբ հանդերձ»:
ՀՌԻՓՍԻՄԵ ՋԵԲԵՋՅԱՆ
«Առավոտ» օրաթերթ
3.12.2014
Ես էլ վստահում եմ այն բոլոր համաշխարհային ուժերին, ովքեր գտնում են, որ կուզիկին հողն է դզում: