Այսօր ԱԺ-ում լրագրողների հետ զրույցում վարչապետ Հովիկ Աբրահամյանը մեկնաբանեց դրամի արժեզրկման ու թանկացումների հետ կապված խնդիրները: Նրա խոսքերով՝ «Մենք Տնտեսական մրցակցության պաշտպանության պետական հանձնաժողովի միջոցով մոնիթորինգ ենք իրականացրել, 5 տոկոսի շրջանակներում է գնաճը, որը ես նորմալ եմ համարում»:
Ըստ վարչապետի, դա չպետք է կապել ներքին տնտեսական զարգացումների հետ, դա միջազգային տնտեսությունում տեղի ունեցող զարգացումների հետեւանք է. «Դա տարածաշրջանային տնտեսության այդ վեր ու վարի պատճառներն են, որ բացասական ազդեցություն են ունենում մեր տնտեսության վրա:
Լրագրողները ճշտեցին, թե միջազգային ասելով ի՞նչ նկատի ունի, կոնկրետ ՌԴ տնտեսությունում տեղի ունեցող զարգացումների հետեւա՞նք է դա, Հովիկ Աբրահամյանը պատասխանեց. «Այո, եւ կարծես թե մի քիչ էլ մեր ժողովրդի անվստահությունն է: Բայց որեւէ խնդիր չկա, Կենտրոնական բանկը տիրապետում է իրավիճակին: Ես համոզված եմ, որ առաջիկա մի քանի օրը դա կկանոնակարգվի: Եթե լինում են նման խոշոր տատանումներ, անպայման Կենտրոնական բանկը միջամտում է»:
Վարչապետը նշեց, որ կառավարության համար կարեւոր է, որպեսզի տնտեսության տարբեր ճյուղեր օգտվեն հնարավորություններից, եւ կարեւոր է, որ գնաճը լինի իրատեսական:
Հռիփսիմե ՋԵԲԵՋՅԱՆ
