«Թուրքիա մատակարարվող ռուսական գազի գնի նվազեցումը ընդամենը 6 տոկոսով բավարար չէ», – մեկնաբանելով Ռուսաստանի նախագահ Վլադիմիր Պուտինի` Անկարայում երկուշաբթի օրն արված հայտարարությունները, պնդում է Թուրքիայի վարչապետ Ահմեթ Դավութօղլուն: Այդ մասին թուրքական կառավարության ղեկավարը հայտարարեց երեկ` իշխող «Արդարություն և զարգացում» կուսակցության խորհրդարանական խմբակցության ամենշաբաթյա նիստի ժամանակ:
«Արդեն տեղյակ եք, որ Ռուսաստանը որոշեց 6 տոկոսով նվազեցնել Թուրքիա մատակարարվող բնական գազի գինը: Այդ մասին հայտարարեց պարոն Պուտինը [Անկարայում կայացած] մամուլի ասուլիսի ժամանակ: Այդ ասուլիսից անմիջապես հետո մենք դիմեցինք նրան` ասելով, որ գնի նման իջեցումը նշանակալի չէ: Բանակցությունները այս խնդրի շուրջ դեռ շարունակվելու են», – ասաց Դավութօղլուն` հույս հայտնելով, սակայն, որ Մոսկվան ու Անկարան կկարողանան պահպանել տնտեսական հարաբերությունների զարգացման վերջին տարիներին նկատվող դրական դինամիկան:
«Որևէ մեկը չէր էլ կարող կանխատեսել, որ Թուրքիան և Ռուսաստանը շատ կարճ ժամանակահատվածում կկարողանան զարգացնել հարաբերությունները` հասցնելով ներկա մակարդակին: Մեր երկկողմ ապրանքաշրջանառության ծավալը հասել է տարեկան 32 միլիարդ դոլարի ցուցանիշին: Վլադիմիր Պուտինի հետ բանակցությունների ընթացքում մենք ապագային վերաբերող մի շարք այլ կարևոր որոշումներ ենք կայացրել», – հայտարարեց Դավութօղլուն:
Թուրքական կողմը, սակայն, չի թաքցնում, որ ամենակարևոր որոշումը` գազի վերջնական գնի հստակեցումը, դեռ չի կայացվել: Ռուսական «Գազպրոմ»-ին մոտ կանգնած աղբյուրները պնդում են, որ թուրքական կողմի պատկերացմամբ` փոխզիջումը գազի գնի նվազեցումն է ոչ թե 6, այլ միանգամից 15 տոկոսով:
Կարդացեք նաև
Մանրամասները կարող եք կարդալ` «Ազատություն» ռ/կ-ի կայքում
