«Բանդայի գործով» դատախազ Սասուն Խաչատրյանը միջնորդեց տասնհինգ տարվա ազատազրկման դատապարտել «պարագլխին» ՝ Արտուշ Հակոբյանին: Միեւնույն ժամանակ դատախազը չփարատված կասկած համարեց այն ապացույցները, որոնք ձեռք էին բերվել թմրանյութի ապօրինի պահման մասով, եւ հրաժարվեց մեղադրանքից:
Կենտրոն եւ Նորք-Մարաշ վարչական շրջանների ընդհանուր իրավասության դատարանում Արտուշ Հակոբյանի քույրը դատական նիստերի դահլիճից դուրս գալով լացակումած պատմում էր, թե ինչպես են եղբորը ձերբակալել:
Նա Aravot.am- ին ասաց, որ չորս օր տեղյակ չեն եղել, թե որտեղ են պահվել իր երկու եղբայրները:
Կարդացեք նաև
«Ես ինքս վազել եմ վեցերորդ վարչություն, ասել են՝ այստեղ չի, գնացել եմ ԿԵՊԵԶԵ, ասել են, ստեղ չի, ոչ ոք չի տեղեկացրել՝ ո՞ւր են մեր երկու որդիները: Եւ վերջապես, խուլիգանաբար, ծեծելով, ջարդելով, ուզում են ապացուցել իրենց չարած հանցագործությունը:Լավ, որտեղ է սրանց ճիշտը:Վախենում են ճշտի աչքերին նայել:
Ղեկավարում են դատախազին, որ ինքը գա այստեղ ելույթներ ունենա, սուտ ապացույցներ բերի, հերքում բերի: Ոստիկանությունում գլխարկը հագցրել են Արտուշի գլխին, ԿԵՊԵԶԵ-ից բերել են վեցերորդ վարչություն: Իհարկե, այդ ճանապարհին շնչառության, քրտինքի կաթիլները պիտի մնային դիմակի վրա: Մինչեւ երբ առանց ապացույցի տասնհինգ տարի կալանք տան մարդուն: Որտեղ է իրականությունը»:
Դատախազը տասնմեկ տարվա ազատազրկման միջնորդություն արեց ամբաստանյալ Արթուր Մանուկյանի համար:
Իմ զրուցակիցը Արթուրի զոքանչն էր: Նա ասաց. «Արթուրը վաղուց իմ աղջկա հետ ընկերություն էր արել: Գնացել էր Մոսկվա, որպեսզի գումար աշխատեր, բերեր նշանադրության համար: Զանգել է, ասել՝ մի քանի օրից կգամ: Չի հանդիպել աղջկաս: Հետո իմացել ենք, որ բանդա են բռնել, ոմն մեր Արթուրը եղել է Գուգոյի հետ ավտովթարի ժամանակ:
Գիտեմ, դա եմ ասում: Հետո բռնել են Արթուրին: Ցուցմունքը գրված է 23-ին, բայց ցուցմունքն արդեն պատրաստ էր: Ինքը ենթարկվել է խոշտանգումների: Նախ, իմ փեսայի ցուցմունքն իր ձեռքով գրված չի, ցուցմունքը գրված է իմ փեսային բռնելուց մեկ օր առաջ:
Խոշտանգումներրից հետո իմ փեսայի մասին դատաբժշկական փորձաքննությամբ, պարզվել էր, որ դա եղել է իբր ավտովթարից եւ ոչ թե խոշտանգումների հետեւանքով:
Փեսայիս գլխին հարվածել են դուբինկաներով: Հասկացանք, բռնել են, վերջապես ամեն բան չի կարելի բարդել այս տղաների վրա: Իր ընտանիքը գիտեք ինչպես է ապրում:Իր ընտանիքում հայրը երեք անգամ սրտի կաթված է տարել, մորը չորս անգամ վիրահատել են, անառողջ վիճակ է, միակ կերակրողն Մանուկյանն է եղել: Չի կարելի բանդայի անդամ համարել մարդուն, գոնե Աստծուց պիտի վախենալ»:
Հաջորդ դատական նիստին պաշտպանական ճառերով հանդես կգան Հովիկ Արսենյանը, Ստեփան Ոսկանյանը, Ռաֆիկ Սաֆարյանը, Հակոբյանը:
Ռուզան ՄԻՆԱՍՅԱՆ
