«Սպասում էի, երբ իրենք պետք է լքեին քառյակը, ցույց տային՝ ինչու էին քառյակում: Չեմ համարում, որ ազնվորեն էին քառյակ մտել, ես երբեւէ այդ քաղաքական ուժի ներկայացուցիչներին ազնիվ չեմ համարել, խոսքս չի վերաբերում դիվանի մեկ երկու ներկայացուցիչներին: Նրանք այս իշխանությունների հետ հավասար թալանի, կեղեքման ու մնացած այլ բացասական հարցերում լուրջ մասնակցություն են ունեցել: Ու եթե մոռացել են՝ ինչ են արել, թող google.am –ում որոնեն, իրենց ցանկացած կատարածի մասին տեղեկատվություն կա»,- Aravot.am-ի հետ զրույցում ասաց ՀԱԿ անդամ Զոյա Թադեւոսյանը, երբ նրան հիշեցրին, որ ամիսներ առաջ խոստացել էր ՀՅԴ-ի մտադրությունների վերաբերյալ իր գնահատականները ներկայացնել:
Նրա խոսքով, իրենք փորձում էին ՀՅԴ-ին ավելի լավ լինելու հնարավորություն տալ, բայց.«Եթե փորձում էինք իրենց հետ ճանապարհ գնալ, դա չէր նշանակում, որ մոռացել էինք՝ ինչ են արել, կարծում էինք՝ ցանկացած մարդ ունի իրավունք վերանայելու իր վարքագիծը, ինքնամաքրվելու: Ինքնամաքրվելու հնարավորություն էինք տվել, բայց չինքնամաքրվեցին»:
Մեր հարցին՝ հնարավո՞ր է, առաջիկայում ԲՀԿ-ից էլ հիասթափվեն, ավելի վաղ ԲՀԿ-ին էլ էին մեղադրում իշխանության հետ համագործակցելու մեջ, Զոյա Թադեւոսյանն ասաց. «ԲՀԿ-ի հետ տարաձայնություններ չկան: Կան տարբեր դիտարկումներ. Ամեն ինչ լավ է»:
Արփինե ՍԻՄՈՆՅԱՆ
