Այսօր լրագրողների հետ զրույցում ԱԺ նախագահ Գալուստ Սահակյանը վերջին օրերի գնաճային ճնշումները կապեց Ամանորի հետ. «Հենց Նոր տարվա օրերն է գալիս, աշխարհի տարբեր երկրներում դեպի էժանացում է գնում, որովհետև շրջանառությունն է մեծանում, իսկ Հայաստանում թանկացումներ են գնում, որովհետև շրջանառությունը շատ փոքր է լինում»:
Ըստ պարոն Սահակյանի, այս թանկացումներից հարուստները չեն շահում. «Ավելի շատ դա կապված է փոքր ու միջին բիզնեսի հետ, քան հարուստների հետ: Մեզ այս իրավիճակը մտահոգում է: Եթե իշխանություններին չմտահոգեր, մենք չէին լինի այստեղ: Ամենաշատը իշխանությանն է մտահոգում, որովհետեւ իշխանության իմիջի խնդիր է, եւ հայրենասիրությունը կապված է հենց նրա հետ, որ ժողովուրդը լավ ապրի»:
Հարցին՝ կանխատեսելի՞ էր տնտեսությունում ստեղծված այս իրավիճակը, գների թանկացումը, Գալուստ Սահակյանը պատասխանեց, որ վերլուծություններ ու կանխատեսումներ կան, բայց դրանցով ժողովրդին չես կշտացի: Այսինքն՝ կան օբյեկտիվ պատճառեր, կլինեն նաեւ սուբյեկտիվ:
Գալուստ Սահակյանը էժանացում չխոստացավ, բայց ասաց, որ իշխանությունները զսպման մեխանիզմներ կկիրառեն: Թե ինչ կլինի այդ գործողությունների արդյունքում, կերեւա դեկտեմբերի 15-ից հետո:
Կարդացեք նաև
Հարցին՝ իշխանությունները բողոքի ալիքից չե՞ն վախենում՝ նա պատասխանեց. «Եթե մարդը վատ է ապրում, պիտի բողոքի էլ, բայց ալիքի հետ մի քիչ զգույշ վերաբերվեք, դա թողեք Փաշինյանին»:
Հռիփսիմե ՋԵԲԵՋՅԱՆ
